ރޯދަ ވީއްލުމަކީ ފަރުޟެއްތޯ ނުވަތަ ނޫންތޯ؟ އަދި ރޯދަ ވިއްލާ ގަޑީގައި މީހަކު މިސްކިތާ ހަމައަށް ފޯރި އިރު، މިސްކިތުގައި ޖަމާޢަތުގައި ނަމާދު ކުރަނީ އެވެ. އެހެންވެއްޖެ ނަމަ އޭނާއަށް އެންމެ އެދެވިގެންވާ ގޮތަކީ، ނަމާދު ކުރުމަށްފަހު ރޯދަ ވީއްލުންތޯ ނުވަތަ ރޯދަ ވީއްލުމަށް ފަހު ޖަމާޢަތުގައި ބައިވެރިވުންތޯ؟
ރަސޫލުﷲ ޞައްލަﷲ ޢަލައިހި ވަސައްލަމަގެ ޙަދީޘްތަކުން ދަލީލު ލިބެނީ، ރޯދަ ވިއްލުމުގައި ސުންނަތް ގޮތަކީ، ރޯދަ ވީއްލުން ވީ ހާވެސް އަވަސްކުރުމެވެ. ސަޢުދު ބިން ސަހުލު ރަޟިޔަﷲ އަންހުގެ ކިބައިން ރިވާވެގެން އައިސްފައިވެއެވެ. ރަސޫލުﷲ ޞައްލަﷲ ޢަލައިހި ވަސައްލަމަ ޙަދީޘްކުރެއްވިއެވެ. (( ރޯދަ ވިއްލުން އަވަސް ކުރާހައި ހިނދަކު މީސްތަކުން ވަނީ ހެޔޮކަމުގައެވެ.) –رواه البخاري ومسلم–
އެގޮތުން، އެއްމެ އެކަށީގެންވާ ގޮތަކީ، ބަނޑުހައިކަން ކެނޑިގެންދާ ވަރުގެ ކުޑަ އެތިކޮޅަކުން ފުރަތަމަ ރޯދަ ވީއްލުމަށް ފަހު، ދެން ނަމާދު ކުރުމަށް އަވަސްވެގަތުމެވެ. އެއަ ށްފަހު ބޭނުންވާ ނަމަ، ކެއުމަށް އަލުން ރުޖޫޢަވުމެވެ.
ރަސޫލުﷲ ޞައްލަﷲ ޢަލައިހި ވަސައްލަމަ ކަންތައް ކުރެއްވީ މިފަދައިންނެވެ. އަނަސް ބުން މާލިކު ރަޟިޔަﷲ ޢަންހު ވިދާޅުވިއެވެ. (ނަމާދުގެ ކުރިން ރަސޫލުﷲ ޞައްލަﷲ ޢަލައިހި ވަސައްލަމަ ރޯ ކަދުރުން ރޯދަވިއްލަވައެވެ. ރޯ ކަދުރު ނުލިބިއްޖެ ނަމަ ހިކި ކަދުރުންނެވެ. ފެން ކޯވަރުތަކަކުންނެވެ.) – رواه الترمذي وصححه الألباني في صحيح أبي داود –
މި ޙަދީޘްގެ ޝަރަޙައިގައި ފަޟީލަތުއްޝައިޚް އަލް މުބާރަކުފޫރީ – ހަފިޡަހުﷲ – ވިދާޅުވެފައިވެ އެވެ. ”ރަސޫލުﷲ ޞައްލަﷲ ޢަލައިހި ވަސައްލަމަ، ރޯދަ ވިއްލުން އަވަސްކުރުމަށް ބާރުއަޅުއްވައިފައިވާ މިންވަރު މި ޙަދީޘުން އެނގިގެން ދެއެވެ.“
މަސްދަރު: ދިސަލަފިއްޔާ