މިފްކޯ އަކީ ފައިދާވާ ކުންފުންޏަކަށް ހަދާނެ ކަމަށް އެ ކުންފުނީގެ އާ ސީއީއޯ ފަރުޙަތު ޝަޙީރު ވިދާޅުވެއްޖެ އެވެ.
ދައުލަތުގެ މީޑިއާ، ޕީއެސްއެމްގައި އޭނަ ވިދާޅުވީ، މަސްވެރިކަމުގެ ދާއިރާއަށް ދެމެހެއްޓެނިވި ތަރައްގީތަކެއް ގެނެވިއްޖެ ނަމަ، ކުރިއެކޭ އެއް ގޮތަށް މި ސިނާއަތަކީ ރާއްޖޭގެ އެއްވަނަ ސިނާއަތަށް ހެދޭނެ ކަމަށެވެ. އެގޮތުން މިފްކޯގެ އަމާޒު ހުރީ އެ އަމާޒަށް ކަމަށާއި އެކަން ކާމިޔާބު ކުރެވޭނެ ކަމަށް ގަބޫލު ކުރައްވާ ކަމަށް ވެސް ވިދާޅުވި އެވެ.
ފަރުހަތު ވިދާޅުވީ ކަމާ ގުޅުންހުރި ފަރާތްތައް ގުޅިގެން ކުރެވޭ މަސައްކަތުން މި އަމާޒަށް ވާސިލުވެވޭނެކަމުގެ ފުރިހަމަ ޔަގީންކަމާއި އިތުބާރު އޮތް ކަމަށެވެ.
"މިހާރު މިފްކޯ އޮތް ހާލަތުން ކޮޅައް ޖެހުމަށް ވަރަށް އަވަހަށް މުހިންމު ފިޔަވަޅުތަކެއް އަޅަން ޖެހޭ. ވަރަށް ޓަފް ޑިސިޝަންތަކެއް އަޅުގަނޑުމެން ނަގަން ޖެހޭނީ،" ފަރުހަތު ވިދާޅުވި އެވެ. "އެކަންކަން ކުރެވިއްޖެ ކަމަށްވަންޏާ ﷲ އިރާދަފުޅާއެކު މި ކުންފުންޏަކީ މަސްވެރިކަމުގައި ދިވެހި ރާއްޖޭގައި ލީޑްކުރާ ފައިދާ ކުރަނިވި ކުންފުންޏަކަށް ހެދޭނެ ކަމުގެ ޔަޤީންކަން އެބައޮތް."
މާލީ ބޮޑެތި ތާށިތަކެއްގެ ތެރޭގައި އޮތް މިފްކޯގެ ސީއީއޯގެ މަގާމަށް މިދިޔަ ހަފުތާގައި ފަރުހަތު އައްޔަން ކުރީ މި ސަރުކާރުން އެ ކުންފުނީގެ ސީއީއޯއަކަށް އައްޔަންކުރި ފުރަތަމަ ބިދޭސީ ސީއީއޯ މަގާމުން ވަކިކުރުމަށް ފަހު އެވެ. ޔުކްރޭނަށް ނިސްބަތްވާ ޑރ. ވިތާލީ ލުބިމޮވް މި މަހުގެ 3 ގައި މަގާމުން ވަކިކޮށް، ފަރުހަތު ސީއީއޯއަކަށް އައްޔަންކުރި އިރު، ވިތާލީ ސީއީއޯއަކަށް ހަމަޖެއްސީ މިދިޔަ އަހަރުގެ ޑިސެމްބަރު މަހުގެ ތެރޭގަ އެެވެ.