އައްޑޫ ސިޓީ ކައުންސިލްގެ ބަޖެޓުން ޚަރަދުކޮށްގެން މުނިސިޕަލް ހިދުމަތްތަކުގައި ބޭނުން ކުރަން ގެނައި 4 ޕިކަޕުގެ ތެރެއިން، ހައުސިން މިނިސްޓްރީ އާއި ހަވާލުކުރި 2 ޕިކަޕް ވަނީ ފުލުހުންގެ ބޭނުމަކަށް ދޫކޮށްފައިކަން 'އައްޑޫލައިވް' އަށް އެނގިއްޖެއެވެ.
ހައުސިން މިނިސްޓްރީގެ އޮފިޝަލަކު ވިދާޅުވި ގޮތުގައި ފުލުހުންގެ ހަރަކާތެއްގައި ބޭނުން ކުރުމަށް އައްޑޫ ސިޓީގައި ޤާއިމްކޮށްފައިވާ އެ މިނިސްޓްރީގެ އޮފީހުގެ ބެލުމުގެ ދަށުގައި އޮތް 2 ވެހިކަލެއް ދޫކޮށްފައިވާ ކަމަށެވެ.
މައުލޫމާތު ލިބިފައިވާ ގޮތުގައި ކުއްތާ ބޭނުންކޮށްގެން އައްޑޫ ސިޓީގައި ފުލުހުން ފަށާފައިވާ އޮޕަރޭޝަނުގައި ކުއްތާ އުފުލުމަށް ބޭނުންކުރަނީ، ހައުސިން މިނިސްޓްރީގެ ފަރާތުން ދޫކޮށްފައިވާ 2 ޕިކަޕެވެ.
ހައުސިން މިނިސްޓްރީގެ ބެލުމުގެ ދަށުގައި އޮތް 2 ޕިކަޕް ނެތުމުން މުނިސިޕަލް ސާވިސްގެ މަސައްކަތްތައް އެއްކޮށް ހުއްޓިފައިވާ ކަމަށް ބުނެ ބައެއް މުވައްޒަފުން ކަންބޮޑުވުން ފާޅުކޮށްފައިވާތީ އެކަމާއި ބެހޭގޮތުން ސުވާލުކުރުމުން އޮފިޝަލް ވިދާޅުވީ އެފަދަ ޝަކުވާތަކެއް އުޅޭ ކަން އެނގިވަޑައިނުގަންނަވާ ކަމަށެވެ.
ހައުސިން މިނިސްޓްރީގެ ބެލުމުގެ ދަށުގައި އޮތް 2 ޕިކަޕަކީ އައްޑޫ ސިޓީ ކައުންސިލްގެ ބަޖެޓުން ޚަރަދުކޮށްގެން ގަނެފައިވާ 4 ޕިކަޕުގެ ތެރެއިން 2 ޕިކަޕެކެވެ.