މިއަދުގެ ހާއްސަ: ޑްރެގެން ފުރުޓް

ޕިޓާޔާ ނުވަތަ ޑްރެގެން ފުރުޓަކީ ކެކްޓަސް އާއިލާ އަށް ނިސްބަތްވާ ގަހެއްގައި އަޅާ މޭވާއެކެވެ. މި މޭވާގެ ބޭރު ތޮށިގަނޑުގައި ކުޑަ ހަރުކަމެއް ހުރެއެވެ. ގަހުގައި މި މޭވާ އަޅާފައި ހުންނައިރު ބޮޑަށް ވައްތަރުވަނީ ޑްރެގަނަކާއެވެ. މިއީ މި މޭވާ އަށް މި ނަން ލިބުނު ސަބަބު ކަމުގައި ބެލެވެ އެވެ.

ޑްރެގެން ފުރުޓްގެ ބޭރުފުށުގައި ގަދަ ފިޔާތޮށި ކުލައާއި ރީނދޫ ކުލަ ހިމެނެއެވެ. މި މޭވާގައި ވަނީ މަޑު މީރު ފޮނި ހުތް ރަހައެކެވެ. ގިނަ ބަޔަކު ބުނާ ގޮތުގައި މި މޭވާގެ ރަހަ ކައިރި ކުރަނީ ޕެއާސް އަދި ދޮން ކީވީގެ ރަހައާ އެވެ. މި މޭވާގެ ޚާއްޞަ ކަމެއްގެ ގޮތުގައި ފާހަގަ ކުރެވެނީ މިއީ ހަށިގަނޑަށް ބޭނުންވާ ދަގަނޑުގެ ބައި އިތުރުކޮށްދޭ މޭވާއަކަށް ވުމެވެ. ދަގަނޑަކީ ހަށިގަނޑުގެ ތެރޭގައި ހުންނަ އޮކްސިޖަން ދައުރުކޮށްދިނުމަށް އެހީތެރިވެދޭ މާއްދާއެކެވެ.

ޑްރެގެން ފުރުޓް ކެއުމުގެ ގޮތްތަކުގެ ތެރޭގައި ސީދާ ކެއުމުގެ އިތުރުން ގްރިލްކޮށްގެން ކެއުން ހިމެނެ އެވެ. އަދި މީގެ އިތުރުން ޑްރެގަން ފުރުޓް ސްމޫތީ އާއި އެކި ބާވަތުގެ ފޮނިކާތަކެތި ތައްޔާރު ކުރުމުގައި ވެސް މި މޭވާ ބޭނުން ކުރެ އެވެ.

ރާއްޖޭގައި މިހާރު ހައްދަމުން ވެސް އަންނަ އެކަމަކު ބާޒާރުގައި ޑްރެގަން ފުރުޓްގެ އަގު ބޮޑުކަމުގައި ވިޔަސް، މިއީ ކުޑަކުދިން އެންމެ މީރުކޮށް ކައިއުޅޭ އެއް މޭވާ ކަމަށް ފާހަގަކުރެވެ އެވެ. މި މޭވާގެ އަސްލު ނިސްބަތްވަނީ ސެންޓްރަލް އެމެރިކާއަށެވެ. އަދި މިއީ ހަޖަމުގެ ބަލިތަކަށް ލުޔެއް ގެނުވައިދޭ މޭވާއެއްގެ ގޮތުގައި ވެސް ބެލެވެ އެވެ.

ޑްރެގަން ފުރުޓްގެ ޞިއްޙީ ފައިދާތަކުގެ ތެރޭގައި ކޮލެސްޓްރޯލް ދަށްކޮށް ދިނުން ހިމެނެ އެވެ. އެންޓި އޮކްސިޑެންޓްތަކުން ފުރިގެންވާ މި މޭވާއަކީ ރަނގަޅު ޞިއްޙަތެއްގައި އިންސާނާގެ ހިތް ބޭއްވުމަށް އެހީތެރިވެދޭ މޭވާއެކެވެ. މީގެ އިތުރުން މި މޭވާގައި ޕޮޓޭސިއަމާއި ދަގަނޑުގެ ބައިގެ އިތުރުން ވިޓަމިން ސީ ވެސް ހިމެނެ އެވެ.

އެހެންކަމުން ޑްރެގަން ފުރުޓަކީ ރަހަ މީރު، ޞިއްޙީ ގޮތުން ފައިދާ ބޮޑު، އަދި ކުޑަކުދިންނާއި ބޮޑެތި މީހުން ވެސް ކެއުމަށް ލޯބިކުރާ މޭވާއެކެވެ. މި މޭވާގެ ބޭނުން ދުޅަހެޔޮ ދިރިއުޅުމަކަށް ހިފުމަކީ މުހިންމު ކަމެކެވެ.

މައުލޫމާތު: އެގްރިކަލްޗަ މިނިސްޓްރީ