އުރީދޫ މޯލްޑިވްސް އަށް މިދިޔަ އަހަރު ލިބުނު ފައިދާ އިން ހިއްސާއަކަށް 3.43ރ. ބަހަން އަހަރީ އާންމު ޖަލްސާގައި ފާސްކޮށްފި އެވެ.
ހުޅުމާލޭގައި ހުންނަ އެ ކުންފުނީގެ ހެޑް ކުއާޓަރުގައި ބޭއްވި އަހަރީ އާންމު ޖަލްސާގައި 60 ހިއްސާދާރުންނާއި 11 ޕްރޮކްސީ ހޯލްޑަރުން ބައިވެރިވެފައިވެ އެވެ.
މިދިޔަ އަހަރުގެ ފައިދާގެ ގޮތުގައި ހިއްސާއަކަށް 3.43ރ. ބަހަން އުރީދޫގެ އަހަރީ އާންމު ޖަލްސާގައި ފާސްވީ ޖަލްސާގައި ބައިވެރިވި ހިއްސާދާރުންގެ 99 ޕަސެންޓް ވޯޓުންނެވެ. މި އަހަރަކީ ހިއްސާއަކަށް އެންމެ ބޮޑު އަދަދެއް ދޫކުރަން ނިންމި ފުރަތަމަ ފަހަރެވެ. މީގެ ކުރިން ހިއްސާއަކަށް އެންމެ ބޮޑު އަދަދެއް ދިނީ 2019 ގަ އެވެ. އެ އަހަރު ހިއްސާއަކަށް ދޭން ފާސްކުރީ 3.30ރ. އެވެ.
އުރީދޫން މި އަހަރު ހިއްސާގެ ފައިދާގެ ގޮތުގައި ބަހަން ނިންމި އަދަދަކީ 2023 ގައި ދޫކުރި އަދަދަށް ވުރެ 16 ލާރި އިތުރު އަދަދެކެވެ. އެ އަހަރު ފައިދާއިން ހިއްސާދާރުންނަށް ބެހީ ހިއްސާއަކަށް 3.27ރ. އެވެ.
އުރީދޫން އާންމުކޮށްފައިވާ މިދިޔަ އަހަރުގެ މާލީ ރިޕޯޓްގައިވާ ގޮތުން މިދިޔަ އަހަރު ކުންފުންޏަށް ލިބުނު އާމްދަނީ ވަނީ 2023 ވަނަ އަހަރާ އާޅާ ބަލާއިރު 5.05 ޕަސެންޓް އިތުރުވެފަ އެވެ. އެގޮތުން 2023 ގައި 2.09 ބިލިޔަން ރުފިޔާގެ އާމްދަނީއެއް ލިބުނު އިރު މިދިޔަ އަހަރު 2.2 މިލިޔަން ރުފިޔާ ލިބުނެވެ.
ދެހާސް ތޭވީހުގެ ސާފު ފައިދާގެ ގޮތުގައި 809 މިލިޔަން ރުފިޔާ ލިބުނު އިރު، މިދިޔަ އަހަރު ސާފު ފައިދާ އަކީ ގޮތުގައި 684 މިލިޔަން ރުފިޔާ އެވެ.
އުރީދޫގެ ހިދުމަތް ރާއްޖޭގައި ދެމުން އަންނަނީ 2005 އިން ފެށިގެންނެވެ. މި ކުންފުންޏަކީ ރާއްޖޭގައި މުވާސަލާތީ ހިދުމަތްދޭ ދެވަނަ ކުންފުންޏެވެ.