ރާއްޖޭގެ ޝަރުއީ ދާއިރާ މިހާރު މިއޮތީ ރޭޕުކޮށްފައި ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
ޕާޓީ ބަދަލުކުރުމުން މަޖިލީހުގެ މެމްބަރުކަން ގެއްލޭ ގޮތަށް ގާނޫނުއަސާސީއަށް ސަރުކާރުން ގެނެސްފައިވާ އިސްލާހު ބާތިލުކުރަން ސުޕްރީމް ކޯޓަށް ހުށަހަޅާފައިވާ މައްސަލަ ކުރިއަށް ދަނިކޮށް ޖޭއެސްސީން ވަނީ ކުއްލިގޮތަކަށް ސުޕްރީމް ކޯޓުގެ ތިން ފަނޑިޔާރަކު ސަސްޕެންޑްކޮށްފަ އެވެ. އަދި ސަރުކާރުން ސުޕްރީމް ކޯޓުގެ ފަނޑިޔާރުންގެ ބެންޗަށް ނުފޫޒު ފޯރުވާ ކަމަށް ބުނެ އެ ބެންޗުގައި ހިމެނިވަޑައިގެންނެވި ފަނޑިޔާރު ހުސްނުއްސުއޫދު ދާދިފަހުން ވަނީ އިސްތިއުފާ ދެއްވާފަ އެވެ.
"އަދަދު" ނޫހުން ގެނެސްދިން ޕްރޮގްރާމެއްގައި ވާހަކަދައްކަމުން ޖަމީލު ވިދާޅުވީ ރާއްޖޭގެ ޝަރުއީ ދާއިރާ މިހާރު މިއޮތީ ގަދަކަމުން ރޭޕުކޮށްފައި ކަމަށާއި ހުރިހާ ވެސް މައްސަލައަކީ ބަންޑާރަ ނައިބު އަހުމަދު އުޝާމް ބޭނުންވި ގޮތަށް ކޯޓުން ކަންކަން ނުވުން ކަމަށެވެ.
"ދެން ގެއަށް ގޮސް، އެއައި ގޮތަށް އައިސް އަތުގައި ހުރި ބާރާއި ކަނޑި އާއި ބަޑި ބޭނުންކޮށްގެން އެމީހުން ރޭޕްކޮށްލީ. އެމީހުންގެ ގަޔަށް އަރައި، އެމީހުން ޒަހަމްކޮށް އެމީހުންނަށް ބޮޑެތި އަނިޔާ މިދިނީ،" ޖަމީލު ވިދާޅުވި އެވެ.
ޖަމީލު ވިދާޅުވީ ފަނޑިޔާރުން ސަސްޕެންޑް ކުރަނީ ބޮޑެތި ގޯސްތަކެއް ހެދުމުން ކަމަށާއި އެފަދަ ގޯސްތަކެއް ހަދައިފިނަމަ އެކަން ހުރިހާ އެންމެންނަށް ވެސް އެނގޭނެ ކަމަށެވެ. އަދި މިހާރު މި އުޅެނީ އެފަދަ ކަމެއް ދިމާވެގެން ނޫން ކަމަށާއި މިވަގުތު ސުޕްރީމް ކޯޓުގައި އޮތީ ރާއްޖޭގެ ނިސްބަތުން ވަރަށް ތައުލީމީ ބެންޗެއް ކަމަށްވެސް ވިދާޅުވި އެވެ.