މި ސަރުކާރަށް ޖެހިފައި އޮތީ ކުރީގެ ސަރުކާރުންކޮ ށްފައިވާ ކަންކަމުން ގައުމު ސަލާމަތް ކުރުން ކަމަށް ޕީއެންސީ އަށް ނިސްބަތްވާ އައްޑޫ ފޭދޫ އުތުރު ދާއިރާގެ މަޖިލިސް މެންބަރު އިސްމާއީލް ނިޒާރު ވިދާޅުވެއްޖެ އެވެ.
ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ބަޖެޓް ސަޕޯޓަށް ނެގި 100 މިލިއަން ޑޮލަރު (1.5 ބިލިއަން ރުފިޔާ) ގެ ލޯނެއް މި ސަރުކާރުން މިހާރު ދައްކައި ނިންމާފައިވާ ކަމަށް ފިނޭންސް މިނިސްޓްރީއާ ހަވާލާދީ މީޑިއާއަކުން ގެނެސްދިން ޚަބަރެއްގެ ސުރުހީގެ ސްކްރީންޝޮޓަކާ އެކު ނިޒާރު ވިދާޅުވީ އެއް ބަޔަކަށް އޮތީ ލޯނު ނެގުން ކަމަށެވެ.
"އަނެއް ބަޔަކަށް [މި ސަރުކާރަށް] މިއޮތީ ލޯނުތައް އަނބުރާ ދައްކައި ގައުމު ސަލާމަތް ކުރުން." އޭނަ ވިދާޅުވި އެވެ.
ފެށުނީއްސުރެ މި ސަރުކާރަށް ސަނާ ވިދާޅުވާ މެންބަރު ވަނީ އައްޑޫން ކަރަންޓް ކެނޑޭ މައްސަލަ ވެސް ކުރީ ސަރުކާރުގެ ބޮލަށް ކަނޑައިފަ އެވެ. ނިޒާރު ވިދާޅުވީ މީގެ ކުރިން އައްޑޫގެ ކަރަންޓްގެ ހާލަތު ގޯސް ނުވާ ވަރަށް މިދިޔަ ސަރުކާރުން ކަރަންޓްގެ ހާލަތު ގޯސްފައިވާ ކަމަށެވެ.
ނަމަވެސް މި ސަރުކާރުން އެކަން ހައްލު ކުރަން ގިނަ މަސައްކަތްތަކެއް ކުރަމުން އަންނަ ކަމަށާއި ނަތީޖާ ވެސް ފެންނާނެ ކަމަށް ވިދާޅުވި އެވެ. އެކަމަކު މި ސަރުކާރުން ވައުދުވަމުން އައި ގޮތަށް ކަރަންޓްގެ ހާލަތު ރަނގަޅު ކުރުމުގެ މަސައްކަތް ކުރިއަށް ނުދާތީ އެތައް ބަޔަކު އަންނަނީ ސަރުކާރަށް ފާޑު ކިޔަމުންނެވެ.
މިކަމާ ގުޅިގެން އައްޑޫގެ ކައުންސިލަރުންތަކެއް ފެނަކައާ ދެކޮޅަށް މިދިޔަ ހުކުރު ދުވަހު މުޒާހަރާ ވެސް ކޮށްފައިވެ އެވެ. އެކަމާ ގުޅިގެން ވެސް ނިޒާރު ވަނީ ކައުންސިލަރުންނަށް ފާޑު ވިދާޅުވެފަ އެވެ.