Last Updated: April 6, 10:52
Sunday, April 6, 2025
ޚަބަރު

ރަށްތައް ދޫކުރުމުގެ ބާރު ވެސް މުއިއްޒަށް

ރިސޯޓްތައް ކުއްޔަށްދޭ މުއްދަތު 99 އަހަރަށް އިތުރުކުރަން ފީއެއްގެ ގޮތުގައި އެއްފަހަރާ 10 މިލިއަން ޑޮލަރު ނެގުމަށާއި ރަށްތައް ދޫކުރުމުގެ ބާރު ރައީސަށް ލިބިދޭ ގޮތަށް ޓޫރިޒަމް ގާނޫނަށް އިސްލާހެއް ހުށައަޅައިފި އެވެ.

އެ އިސްލާހު މިއަދު ހުށައެޅުއްވީ ސަރުކާރުގެ ފަރާތުން ތިމަރަފުށި ދާއިރާގެ މެންބަރު އަހުމަދު ރިޔާޒެވެ.

އެ އިސްލާހުގެ މަގުސަދެއް ކަމަށް ބުނެފައިވަނީ ކްރޮސް ސަބްސިޑީގެ ގޮތުގައި ޓޫރިސްޓް ރިސޯޓްް ތަރައްގީކުރުމަށް ރަށް ނުވަތަ ބިން ނުވަތަ ފަޅު ދޫކުރުމާއި ގުޅޭ އުސޫލާއި ޓޫރިސްޓް ރިސޯޓް ހެދުމަށް ދޫކުރާ ރަށް ނުވަތަ ބިން ކުއްޔަަށް ދޫކޮށްފައިވާ މުއްދަތު އިތުކުރުމާއި ގުޅޭ އުސޫލު އިސްލާހު ކުރުން ކަމަށެވެ.

ބިލުގައިވާ ގޮތުން ރިސޯޓެއް ނުވަތަ އިންޓްގްރޭޓެޑް ޓޫރިސްޓް ރިސޯޓެއް ހެދުމަށް ދޫކޮށްފައިވާ ރަށްރަށް ނުވަތަ ބިންބިން ނުވަތަ ފަޅުތަކުގެ ކުއްޔަށްދޭ މުއްދަތު 99 އަހަރަށް އިތުރުކޮށް ދެވޭނެ އެވެ. އެގޮތުން ކުއްޔަށް ނެގި މުއްދަތު އިތުރުުކުރުމަށް ދަައުލަތަށް ފީއެއް ނެގުމަށް ބިލުގައި ވަނީ ހިމަނާފައިވެ އެވެ.

އެގޮތުން 20 އަހަރަށް ނަމަ އެއްފަހަރާ 2.5 މިލިއަން ޑޮލަރު އަދި 25 އަހަރަށްނަަމަ އެއް ފަހަރާ 3 މިލިއަން ޑޮލަރު ދައްކަން ޖެހޭނެ އެވެ.

ބިލުގައިވާ ގޮތުން އެ ބިލް ފާސްވެ ގާނޫނަކަށްވާތާ ހަ މަސް ދުވަހުގެ ތެރޭގައި ކުލީގެ މުއްދަތު އިތުރުކުރުމަށް އެދެވިދާނެ އެވެ.

ބިލުގައި ބަނީ ފަޅާއި ރަށްތައް ދޫކުރުމުގެ ބާރު ރައީސަށް ދޭން ވެސް ހިމަނައިފަ އެވެ. އެގޮތުން މީހުން ދިރިއުޅޭ ރަށްރަށްް ނުވަތަ ސިޓީތައް ނިސްބަތްވާ ރަށު ނުވަތަ ސިޓީ ކައުންސިލުގެ އިހްތިސާސްގައި ހިމެނޭ ފަޅު ރަށްރަށާއި ފަޅުތައް ޓްއަރިޒަމްގެ ބޭނުމަށް ތަރައްގީކުރެވޭ ސަރަހައްދުތަކުގެ ގޮތުގައި ކަނޑައަޅާނީ ރައީސުލްޖުމްހޫރިއްޔާ އެވެ.

އަދި މީހުން ދިރިއުޅޭ ރަށްރަށް ނުވަތަ ސިޓީތަކުގައި އެ ރަށެއް ނުވަތަ ސިޓީއެއް ބިނާވެށީގެ ޕްލޭނާއި އެއްގޮތްވާ ގޮތުގެ މަތިން ޓޫރިޒަމްގެ ބޭނުމަަށް ތަރައް ތަރައްޤީ ކުރެވޭ ބިން ކަނޑައަޅަނީ އެ ރަށެއް ނުވަތަ ސިޓީއެއް ނިސްބަތްވާ ރަށު ނުވަތަ ސިޓީ ކައުންސިލުން ކަމަށް އިސްލާހުގައި ބަޔާންކޮށްފައިވެ އެވެ.