"ގެދޮރުވެރިޔާ" ސްކީމްގެ ދޫކުރާ ފްލެޓްތަކާ ގުޅޭ ގޮތުން ޝަކުވާ ހުށަހެޅުމަށް ފަސޭހަކޮށް ދިނުމުގެ އެހީތެރިކަން ފޯރުކޮށް ދިނުމަށް މާލެ ސިޓީ ކައުންސިލުން ނިންމައިފި އެވެ.
އެ ކައުންސިލުން މިއަދު ނެރުނު އިއުލާނެއްގައި ބުނީ ޝަކުވާ ހުށަހަޅަން ބޭނުންވާ ފަރާތްތަކަށް އެހީތެރިކަން ފޯރުކޮށް ދިނުމުގެ ގޮތުން އެ އިދާރާގެ ޢާއްމު ޚިދުމަތްތަކާ ބެހޭ ބައިގައި މިއަދުން ފެށިގެން މި މަހުގެ 30 ގެ ނިޔަލަށް ހުކުރު ދުވަސް ފިޔަވައި ކޮންމެ ދުވަހަކު އެ އިންތިޒާމު ހަމަޖެހިފައި ވާނެ ކަމަށެވެ.
ހިދުމަތް ދޭން ގަޑިތަކަކީ ހެނދުނު 10:00 އިން 2:30 އަށް އަދި ރޭގަނޑު 9:30 އިން 11:00 އަށެވެ.
ފްލެޓް ލިސްޓަށް ޝަކުވާ ހުށަހެޅުމުގެ ފުރުސަތު ހައުސިން މިނިސްޓްރީން ހުޅުވާލާފައި އޮތީ މި މަހުގެ 31 އާ ހަމައަށެވެ.
"ގެދޮރުވެރިޔާ" ސްކީމްގެ ދަށުން ދޫކުރާ 4،000 ފްލެޓްގެ ކުރިމަތިލި މީހުންގެ ތެރެއިން ޝަރުތުވާ ހަމަވާ ކަމަށް ނިންމާފައި ވަނީ 1،820 މީހެކެވެ.