ރާއްޖޭގެ ފަތުވާ ކޮމިޓީން ދައްކަނީ “ހޫރައްލީނުން” ގެ ވާހަކަ ކަހަލަ ބޭކާރު ވާހަކަ ކަމަށް ވިދާޅުވެ އެމްޑީޕީގެ އަންހެނުންގެ ރޫހުގެ ރައީސާ ރޮޒައިނާ އާދަމް (ރޮޒޭ) ދެއްވެކި ވާހަކަކަތަކާ ގުޅިގެން ޝައިހް އަހުމަދު ސަމީރު ރައްދެއް ދެއްވައިފި އެވެ.
ސުޕްރީމް ކޯޓްގެ ފަނޑިޔާރުންތަކެއް ސަސްޕެންޑް ކުރި މައްސަލާގައި ފަތުވާ ކޮމެޓީން ވާހަކަ ނުދައްކާ ކަމަށް ބުނެ ރާއްޖެ ޓީވީގައި ރޮޒޭ ވިދާޅުވީ ފަތުވާ ކޮމެޓީން ރައްޔިތުންނަށް މުހިންމު ކަންކަމުގައި ވާހަކަ ނުދައްކާ ކަމަަށާއި މުޅީން ވެސް ފެންނަނީ ބޭކާރު ކަންކަމުގައި ފަތުވާ ނެރޭ ތަން ކަމަށެވެ.
އެގޮތުން އެ ކޮމިޓީން އާންމުކޮށް ދައްކަނީ ހޫރައްލީނުން ފަދަ ބޭކާރު ވާހަކަތަކެއް ކަމަށް ވިދާޅުވެފައިވެ އެވެ.
އައްޑޫ މީދޫ ދާއިރާގެ ކުރީގެ މަޖިލިސް މެންބަރުގެ އެ ވާހަތަކާ ގުޅިގެން ސޯޝަލް މީޑިއާ ޕޯސްޓެއްގައި ސަމީރު ވަނީ ކީރިތި ޤުރްއާނުގައި ބަޔާން ކުރައްވާފައިވާ ކަންކަމާ ބެހޭގޮތުން ވާހަކަ ދެއްކުމަކީ ސަމާސާއަކަށް ނުހެދުމަށާއި ފަތުވާ މަޖިލީހުގެ އިޚުތިޞާޞްގެ ތެރެއަށް ނުވަނުމަށް ރޮޒޭ އަށް އިލްތިމާސް ކުރައްވާ ކަމަށް ވިދާޅުވެފަ އެވެ.
"ދިވެހި ރާއްޖޭގައި ދީނީ ގޮތުން ޚިޔާލު ތަފާތުވުން އުފެދޭ މައްސަލަތައް ދެނެގަނެ، އެކަންކަމުގެ ދިރާސާތައްކޮށް، އެފަދަ މައްސަލަތަކުގައި މަޖިލީހުގެ ފަތުވާ އާންމުންނަށް ފޯރުކޮށް ދިނުމީ ފަތުވާ މަޖްލީހުގެ ޤާނޫނީ ޒިންމާތަކުގެ ތެރޭގައި ހިމެނޭ ކަމެއް." އޭނަ ވިދާޅުވިި އެވެ.
އެހެންވެ ޝަރުޢީ ޢިލްމުގެ އަލިފުބާ ވެސް ނުދަނެތިބެ ފަތުވާ މަޖިލީހުގެ އިޚުުތިޞާޞު ތެރެއަށް ވަދެ، އެ ބޭފުޅުންނަށް ހަޖޫޖަހައި، ފަތުވާ މަޖިލީހުގެ ހައިބަތު ވައްޓާލައި ކީރިތި ޤުރްއާނުގެ ޞަރީޙަ ނައްޞުގައި ބަޔާން ކުރައްވާފައިވާ ޙޫރަލްޢީންގެ ވާހަކަތައް ދެއްކުމަކީ ބޭ ކާރުކަމެއް ކަމުގައި ޞިފަކުރުމީ ވަރަށް ދަށުދަރަޖައިގެ ޢަމަލެއް ކަމަށް ސަމީރު ވިދާޅުވި އެވެ.
"މިފަދަ ވާހަކަތަކަކީ ދީނީ ގޮތުން ނުހަނު ޚުޠޫރަތްތެރި ކަންކަމަށް ވުމުގެ އިތުރުން އެއީ ޤާނޫނު ދީނީ އެއްބައިވަންތަކަން ޙިމާޔަތްކުރުމުގެ ޤާނޫނު)ޚިލާފު ޢަމަލެއްވެސްމެ،" އޭނަ ވިދާޅުވި އެވެ. "ވީމާ މިފަދަ ވާހަކަތައް ނުދެއްކެވުމަށް ވަރަށް އިޚުލާޞްތެރިކަމާއެކު ނަޞޭޙަތްތެރިވަން."