Last Updated: April 6, 10:42
Sunday, April 6, 2025
ޚަބަރު

ފައިސާ ޗާޕް ކުރަން އުޅުމަކީ ވަރަށް ބޮޑު ކަންބޮޑުވުމެއް

މި ސަރުކާރުން ނުކުރާނެ ކަމެއް ކަމަށް ބުނެ އެތައް ޕްލެޓްފޯމެއްގައި ރައީސް ޑރ. މުހައްމަދު މުއިއްޒު ފައިސާ ޗާޕް ނުކުރައްވާނެ ކަމަށް ވިދާޅުވުމަށް ފަހު މިހާރު އެކަން ކުރައްވަން އުޅުއްވަމަކީ ވަރަށް ބޮޑު ކަންބޮޑުވުމެއް ކަމަށް ކުރީގެ ޔޫތު މިނިސްޓަރު އަހުމަދު މަހްލޫފް ވިދާޅުވެއްޖެ އެވެ.

އޭނަ ސޯޝަލް މީޑިއާ ޕޯސްޓެއްގައި ވިދާޅުވީ ފައިސާ ޗާޕު ނުކުރައްވާނެ ކަމަށް ތަކުރާރުކޮށް ވައުދުވަޑައިގެން، އަދި އެކަން ނުކުރައްވައި ސަރުކާރު ހިންގަވަމުން ގެންދަވާކަމަށް ފަހުރުވެރިކަމާ އެކު ތަކުރާރުކޮށް ވާހަކަ ދައްކަވާއި، ދިވެހި ތާރީހުގަ އިވެސް ނުކުރާ ވަރަށް ފައިސާ ޗާޕުކުރަން ސަރުކާރުން ނިންމާފައިވާކަމީ ވަރަށް ބޮޑު ކަންބޮޑުވުމެއް ކަމަށެވެ.

މަހްލޫފު ވިދާޅުވީ ރާއްޖެ އަށް އެންމެ ދަތިވި ދުވަސްވަރު ކަމަށްވާ ކޮވިޑް ވަބާގެ ތެރޭގައި ވެސް އޭރުގެ ރައީސް އިބްރާހީމް މުހައްމަދު ސޯލިހު އެކަން ކުރައްވާ ކަމަށެވެ.

"ޑޮލަރުގެ އަގު ބޮޑުތަނުން އުފުލި، ތަކެތީގެ އަގު އިންތިހާއަށް މައްޗަށް އުފުލި، އިންވެސްޓަރުންގެ އިތުބާރު ގެއްލޭނެ ކަމަށް އިޤްތިޞާދީ މާހިރުން ވިދާޅުވަމުން ގެންދަވާ އިރު، ރައްޔިތުންނަށް އިގްތިޞާދީ ބޮޑު ކާރިސާއެއް ދިމާވެދާނެ މިވަރުގެ ބޮޑު ޖަރީމާއެއް ނުހިންގުމަށް އާދޭހާއެކު ސަރުކާރަށް ގޮވާލަން،" އޭނަ ވިދާޅުވި އެވެ. "އައިއެމްއެފް އަދި ވޯލްޑް ބޭންކުގެ ލަފަޔާ ވެސް ދެކޮޅަށް، މިކަން ނިންމަވަން ތިއްބެވި ބޭފުޅުންނަށް މިކަމުގެ ބިރުވެރިކަން އެނގިވަޑައިގަންނަވާނެ."

މަހްލޫފު ވިދާޅުވީ މިހާރު ފައިސާ ޗާޕް ކުރަން އުޅެނީ ރާއްޖެ އިން ބޭރުން ބަޖެޓު ސަޕޯޓެއް ނުހޯދުނީތީ ކަމަށެވެ. ނަމަވެސް ސްރީ ލަންކާ ދިޔަ މަގުން ރާއްޖޭ ދާން ދޫކޮށްލަން ހެޔޮނުވާނެ ކަމަށް ވިދާޅުވި އެވެ.