މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ޑެޕިއުޓީ ގަވަރުނަރު އަހުމަދު އިމާދު ވަކިކުރަން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް މިއަދު ހުށަހަޅައިފި އެވެ.
އެކަން ހުށަހެޅުއްވީ ދިއްދޫ ދާއިރާގެ ޕީއެންސީ މެންބަރު އަބްދުއްލަތީފް މުހައްމަދެވެ.
އެނގިފައިވާ ގޮތުގައި އިމާދު ވަކިކުރަން މަޖިލީހަށް ހުށަހެޅީ އެމްއެމްއޭ އަށް ހުޅުމާލޭން ބިން ގަންނަން އެ އޮތޯރިޓީގެ ބޯޑުން ނިންމި ނިންމުން ރިވިއުކުރަން އޭނަ ހިމެނޭހެން ބޯޑުގެ ތިން މެންބަރަކު ހުށަހަޅާފައި ވަނިކޮށެވެ
އިމާދު ޑެޕިއުޓީ ގަވަރުނަރަކަށް އައްޔަންކުރީ 2020 ގެ ސެޕްޓެމްބަރު މަހުގެ ތެރޭގަ އެވެ. އެމްއެމްއޭގައި 25 އަހަރަށް ވުރެ ގިނަ ދުވަހު މަސައްކަތްކުރައްވާފައިވާ އިމާދަކީ އިނގިރޭސިވިލާތުން އިކޮނޮމިކްސް އާއި ފައިނޭންސްގެ ދާއިރާ އިން މާސްޓާސް ހާސިލް ކުރައްވާފައިވާ ބޭފުޅެކެވެ.
އޭނަ މަގާމުން ވަކިކުރަން ހުށަހެޅި އިރު، ސަރުކާރުން ފައިސާ ޗާޕް ކުރަން އުޅުމާއި އެމްއެމްއޭ އަށް ހުޅުމާލެ އިން ބިމެއް ވިއްލައިގެން ދައުލަށް ފައިސާ ހޯދުމުގެ މުއާމަލާތެއް ހިންގަން އުޅޭކަމުގެ ވާހަކަތަކެއް ދަނީ ދެކެވެމުންނެވެ.
ޑެޕިއުޓީ ގަވަރުނަރު ވަކިކުރަން ހުށަހަޅާފައިވާ އިރު، ފައިސާ ޗާޕް ކުރަން އުޅޭ މައްސަލާގައި އެމްއެމްއޭގެ ބޯޑުން ޝުހާދު އިބްރާހިމް މިއަދު ވަނީ އިސްތިއުފާ ދެއްވައިފި އެވެ.