ސަލާމަތީ ބާރުތަކުން ރޭ ކުރިއަށް ގެންދިޔައީ ޓެރަރިޒަމުގެ އަމަލުތަކާ ދެކޮޅު އޮޕަރޭޝަނެއް ކަމަށާއި، ނަމަވެސް ޓެރަރިޒަމްގެ ނުރައްކަލެއް ނެތް ކަމަށް ފޮރިން މިނިސްޓްރީން މިއަދު ބުނެފި އެވެ.
ފުލުހުންނާއި ސިފައިން ގުޅިގެން ހިންގި އޮޕަރޭޝަނުގައި ތިން މީހަކު ހައްޔަރު ވެސް ކުރި އެވެ.
އޮޕަރޭޝަނާ ގުޅޭ ގޮތުން ފޮރިން މިނިސްޓްރީން ނެރުނު ބަޔާނެއްގައި ބުނީ ކައުންޓާ ޓެރަރިޒަމް އޮޕަރޭޝަންތަކަކީ ރާއްޖޭގެ ސަލާމަތާއި ރައްކާތެރިކަމަށްޓަކައި، އިންޓެލިޖެންސް ރިޕޯޓުތަކާ ގުޅިގެން އާންމުކޮށް ހިންގާ އޮޕަރޭޝަންތައް ކަމަށެވެ. އެގޮތުން ރޭގެ އޮޕަރޭޝަނުގެ ތެރެއިން ތިން މީހަކު ހައްޔަރުކޮށް، އުޅަނދުތަކާއި ގެތައް ފާސްކުރި ކަމަށް އެ މިނިސްޓްރީން ބުންޏެވެ.
ނަމަވެސް އެކަމާ ގުޅުން ހުރި ނުރައްކަލެއް ނެތް ކަަމަށް ބުންޏެވެ.
މިނިސްޓްރީން ބުނީ ރާއްޖެއަކީ ދިވެހީންނަށާއި ގައުމަށް ޒިޔާރަތް ކުރާ މީހުންނަށް ވެސް ރައްކާތެރި ގައުމަކަށް ހެދުމަށްޓަކައި ކަމާ ގުޅުން ހުރި އިދާރާތަކުން އަވަސް ފިޔަވަޅުތައް އަޅަމުންދާނެ ކަމަށެވެ.