Last Updated: April 6, 10:25
Sunday, April 6, 2025
ޚަބަރު

މޫކޭ އާއި ރާއީ ޕޮލިހަށް ހާޒިރުކުރަނީ

އެމްޑީޕީން ސިލްސިލާ ގޮތެއްގައި މާލޭގައި ކުރަމުން އަންނަ މުޒާހަރާތަކާ ގުޅިގެން މަކުނުދޫ ދާއިރާގެ ކުރީގެ މަޖިލިސް މެންބަރު މުޙައްމަދު ރާއީއާއި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ ކުރީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) ފުލުހަށް ހާޒިރުވާން އަންގައިފި އެވެ.

ރާއީ އާއި މޫކޭ ފުލުހަށް ހާޒިރު ކުރަނީ މިދިޔަ އާދީއްތަ ދުވަހުގެ ރޭ އެމްޑީޕީން ކުރިއަށް ގެންދިޔަ މުޒާހަރާގައި އާންމުންނަށް ދަތިވާ ގޮތަށް އަމަލު ކުރުމާއި ފުލުހުންގެ އަމުރަށް ނުކިޔަމަންތެރިވި ކަމަށް ތުހުމަތު ކޮށެވެ.

"2025 މާޗު 9 ވަނަ ދުވަހުގެ ރޭގެ ވަގުތެއްގައި ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާއި ހިލާފަށް މާލޭގެ އެކި ސަރަހައްދުގެ މަގުތަކަށް އެއްވެ އަޑުގަދަކޮށް މުޒާހަރާކޮށް އާންމު ދަތުރުފަތުރު ކުރުމަށާއި އާންމު ވިޔަފާރިތަކަށް ދަތިވާނެހެން ހަރަކަތްތެރިވެ ފުލުހުންގެ ދައުރު އަދާ ކުރުމަށް ހުރަސްއަޅައި ފުލުހުންގެ އަމުރަށް ނުކިޔަމަންތެރިވެ ފުލުހުންގެ ވާޖިބަށް ހުރަސްއަޅާފައިވާ ކަމަށް ތުހުމަތު ކުރެވޭ މައްސަލައިގައި ތުހުމަތު ކުރެވޭތީ ސުވާލުކޮށް ބަޔާން ނެގުމަށް," ފުލުހުން ފޮނުވި ޗިޓުގައި ބުނެފައިވެ އެވެ.

އެމްޑީޕީން އާދިއްތަ ދުވަހުގެ ރޭ ކުރި މުޒާހަރާގެ ތެރެއިން ދެމީހަކު ހައްޔަރު ވެސް ކުރި އެވެ. އެރޭ ހައްޔަރުކުރީ އެ ޕާޓީގެ މައްޗަންގޮޅި ދެކުނު ދާއިރާގެ ރައީސް އިބްރާހީމް އަބްދުﷲ (ގައްބަރޭ) އާއި މައްޗަންގޮޅި މެދު ދާއިރާގެ ރައީސް އަހުމަދު ޝަޒީން އެވެ. އެ ދެ މީހުން ވެސް ފަހުން ވަނީ ދޫކޮށްލާފަ އެވެ.