ރާއްޖޭގެ ޓޫރިޒަމް ދާއިރާ އަށް ކުރިއަރުވަން ބޭނުންވާ ކަމަށާއި އެހެންވެ އެ ދާއިރާ އަށް މާލީ އެހީތެރިކަން ފޯރުކޮށް ދޭން ބޭނުންވާ ކަމަށް ބޭންކް އޮފް މޯލްޑިވްސް (ބީއެމްއެލް) އާއި މޯލްޑިވްސް އިސްލާމިކް ބޭންކް (އެމްއައިބީ) އިން ބުނެފި އެވެ.
އެ ދެ ބޭންކުން އެކަމަށް ޝައުގުވެރިކަން ފާޅުކުރީ ޓޫރިޒަމް އެންޑް އެންވަޔަރަމަންޓް މިނިސްޓަރު ތޯރިގް އިބްރާހީމް އިއްޔެ ވަކިވަކިން ދެ ބޭންކްގެ އިސްވެރިންނާ އެކު ބައްދަލުވުންތަކުގަ އެެވެ.
އެގޮތުން ގައުމީ ބޭންކާ އެކު ބޭއްވި ބައްދަލިވުންތަކުގައި މިނިސްޓަރު ވަނީ ޓޫރިޒަމް ދާއިރާއަކީ ރާއްޖޭގެ އިގުތިޞާދުގެ މައިގަނޑު ދާއިރާ ކަމަށްވާތީ އެ ދާއިރާ އިތުރަށް ކުރިއެރުވުމަށް ބީއެމްއެލްގެ އެހީތެރިކަން ވަރަށް މުހިންމު ކަމަށެވެ. އަދި ތިމާވެށި ރައްކާތެރިކުރުމަކީ ދެމެހެއްޓެނިވި ތަރައްޤީއަށް ކޮންމެހެން ބޭނުންވާ ކަމެއް ކަމަށް ވެސް ވިދާޅުވި އެވެ.
ބީއެމްއެލްގެގެ ސީއީއޯ މުޙައްމަދު ޝަރީފް ވިދާޅުވީ، ޓޫރިޒަމް ދާއިރާ ތަރައްޤީކުރުމަށާއި ތިމާވެށި ރައްކާތެރިކުރުމަށް އެ ބޭންކުން ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ. އެގޮތުން މިކަމަށް ޚާއްޞަ ލޯނު ސްކީމްތަކެއް ތަޢާރަފު ކުރުމަށް ވިސްނާފައިވާ ކަމަށް ވިދާޅުވި އެވެ.
ބައްދަލުވުމުގައި ދެ ފަރާތުން ވަނީ، ކުރިއަށް އޮތް ތަނުގައި އެ ދެ ދާއިރާއަށް އަމާޒުކޮށްގެން އިތުރު މަޝްވަރާތައް ކުރިއަށް ގެންދިއުމަށާއި ކުދި އަދި މެދުފަންތީގެ ވިޔަފާރިތަކަށް އެހީތެރިވުމަށްޓަކައި ގުޅިގެން މަސައްކަތްކުރުމަށް ވެސް އެއްބަސްވެފައި ކަމަށް މިނިސްޓްރީން ބުންޏެވެ.
އެމްއައިބީއާ އެކު ބޭއްވި ބައްދަލުވުމުގައި ތޯރިގް ވިދާޅުވީ ވިދާޅުވީ، ޓޫރިޒަމް ދާއިރާ ތަރައްގީ ކުރުމަށް ސަރުކާރުން ކުރަމުން އަންނަ މަސައްކަތްތަކުގައި އަމިއްލަ ފަރާތްތަކުގެ ބައިވެރިވުން މުހިންމު ކަމަށެވެ. އެހެންވެ އެ ދާއިރާގައި އެމްއައިބީގެ ދައުރު އިތުރުކުރުމަށް ސަރުކާރުން ބޭނުންވާ ކަމަށް ވިދާޅުވިއެވެ.
އެމްއައިބީގެ ސީއީއޯ މުފައްދަލް އިދްރީސް ޚުމްރީ ވިދާޅުވީ، ޓޫރިޒަމް ދާއިރާއަށް އިންވެސްޓް ކުރުމަށް އެ ބޭންކުން ޝައުޤުވެރިކަން ފާޅުކުރާ ކަމަށެވެ. އަދި ތިމާވެށި ރައްކާތެރިކުރުމުގެ މަޝްރޫޢުތަކަށް ފައިނޭންސް ކުރުމަށް ވެސް ބޭންކުން ތައްޔާރު ކަމަށް ވިދާޅުވި އެވެ.