Last Updated: April 4, 17:40
Friday, April 4, 2025
މުނިފޫހިފިލުވުން

އިމްރާން އެނބުރި އަންނަ ފިލްމުގެ ބަތަލާއަކަށް ބޫމީ

ބޮލީވުޑްގެ ކުރީގެ އެކްޓަރު އިމްރާން ޚާން އެނބުރި އަންނަ ފިލްމުގެ ޝޫޓިން އަންނަ މަހުގެ ތެރޭގައި ފަށާނެ ކަމަށާއި އޭގެ ބަތަލާއަކަށް ބޫމީ ޕިޑްނޭކަރް ނަގާފައިވާ ކަމަށް ރިޕޯޓްތައް ބުނެފި އެވެ.

މީޑިއާތަކުން ބުނީ އަދި ނަން ސާފުނުވާ މި ފިލްމަކީ އިމްރާނާއި ދީޕިކާ ޕަދްކޯން ކުޅުނު 2010 ގެ ފިލްމު "ބްރޭކް ކޭ ބާދު" ގެ ޑައިރެކްޓަރު ދާނިޝް އަސްލަމް ލިޔެ، ޕްރޮޑިއުސްކުރާ ރޮމޭންޓިކް ކޮމެޑީއެއް ކަމަށެވެ. ނަމަވެސް ނެޓްފްލިކްސްއާ ގުޅިގެން ހަދަން ނިންމާފައިވާ ފިލްމުގެ ޑައިރެކްޓަރަކީ ކާކު ކަމެއް އަދި ނޭނގެ އެވެ.

ބޮލީވުޑްގެ ޚަބަރުތައް ގެނެސްދޭ މީޑިއާތަކުން ބުނީ ފިލްމުގެ ޝޫޓިން އަންނަ މަހުގެ ތެރޭގައި ފެށުމަށް ވާން ޖެހޭ އެންމެ ފަހުގެ ތައްޔާރީތައް މިހާރު ވަމުން އަންނަ ކަމަށެވެ.

މަޝްހޫރު ތަރި، އާމިރު ޚާނަށް ބޮޑުބޭބެ ކިޔާ އިމްރާން އެންމެ ފަހުން ކުޅުނު ކަންގަނާ ރަނާވަތު ބަތަލާގެ ރޯލު ކުޅުނު ޑައިރެކްޓަރު ނިކިލް އަދުވާނީގެ 2015 ގެ "ކައްޓީ ބައްޓީ" އެވެ. އޭނަ ބޮލީވުޑަށް ނުކުތީ އާމިރު ޕްރޮޑިއުސްކުރި 2008 ގެ "ޖާނޭ ތޫ…ޔާ ޖާނޭ ނާ" އިންނެވެ.

އިމްރާން ކުޅުނު ފާހަގަކޮށްލެވޭ ފިލްމުތަކުގެ ތެރޭގައި "ދިއްލީ ބެލީ" ގެ އިތުރުން "އައި ހޭޓް ލަވް ސްޓޯރީސް"، "މޭރޭ ބްރަދާ ކީ ދުލްހަން" އަދި "އޭކް މޭ އޯރް އޭކް ތޫ" ހިމެނެ އެވެ.

އިމްރާން އަލުން ބޮލީވުޑް ދަތުރު ފަށައި ގަންނަ އިރު، ދަރިޔަކު ވެސް ލިބިފައި ވަނިކޮށް އޭނަގެ ކައިވެނި އޮތީ 2019 ގައި ރޫޅިފަ އެވެ. ރިޕޯޓްތައް ބުނާ ގޮތުން އޭނަ މިހާރު ރައްޓެހިވެގެން އުޅެނީ ލޭކާ ވޮޝިންޓަން ކިޔާ މީހަކާ އެވެ.