ހިތަދޫ ރީޖަނަލް ހޮސްޕިޓަލްގެ ފަރާތުން އައްޑޫ ސިޓީގެ ސްކޫލްތަކުގެ ގްރޭޑް 7 ގެ ދަރިވަރުންނަށް ހާއްސަކޮށްގެން، ހެލްތު ސްކްރީން ޕްރޮގްރާމެއް ފަށައިފިއެވެ.
މިއަދު ފެށި މި ޕްރޮގްރާމްގެ ދަށުން އެންމެ ފުރަތަމަ ސްކްރީންކުރުމަށް ހަމަޖައްސާފައިވަނީ ހިތަދޫ ނޫރާނީ ސްކޫލުގެ ދަރިވަރުންނެވެ.
އެއް މަސް ދުވަހުގެ މުއްދަތަކަށް ތާވަލްކޮށްގެން ހިންގާ މިޕްރޮގްރާމުގެ ދަށުން ހުޅުމީދޫ ސްކޫލްތަކުގެ ދަރިންވަރުންވެސް ސްކްރީން ކުރުމަށްވަނީ ހަމަޖެހިފައިވެއެވެ.
ހިތަދޫ ރީޖަނަލް ހޮސްޕިޓަލުގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި އެ ހޮސްޕިޓަލުގެ ޕަބްލިކްހެލްތު ޑިޕާޓްމެންޓުގެ ފަރާތުން ކުރިއަށް ގެންދާ މިޕްރޮގްރާމުގައި ކުދިންގެ ލޮލުގެ މައްސަލަތަކާއި، ކަންފަތާއި، ދަތުގެ ސިއްހީ ދުޅަހެޔޮކަން ދެނެގަތުމަށް ސްކްރީން ކުރާގޮތަށް ހަމަޖެހިފައިވާކަމަށެވެ.
އަދި މީގެ އިތުރުން މި ޕްރޮގްރާމްގެ ދަށުން ލޭގެ ބައެއް ޓެސްޓްތަކާއި ތެލަސީމިއާއަށް ޓެސްޓްކުރުންފަދަ މުހިންމު ބައެއް ޓެސްޓްތައްވެސް ހެދޭނެ އިންތިޒާމް ހަމަޖެހިފައިވާ ކަމަށް ވެސް ހޮސްޕިޓަލުން މައުލޫމާތު ދެއްވައެވެ.
މިއަދު ފެށި ހެލްތް ސްކްރީން ޕްރޮގްރާމަކީ ،ސަރުކާރުގެ އެޑޮލިސެންޓް ހެލްތުސްކްރީނިން ޕްރޮގްރާމްގެ ދަށުން ހެލްތު ޕްރޮޓެކްޝަން އެޖެންސީއާއި އެޑިޔުކޭޝަން މިނިސްޓްރީ ގުޅިގެން ރާއްޖޭގެ ސްކޫލްތަކުގައި މުޅިން އަލަށް ހިންގާ ޕްރޮގްރާމެކެވެ.