"ޕާޓީގެ ބޭނުމަށް މައުލޫމާތު ހޯދަން" ކަމަށް ބުނެ ސައްހަ ނޫން މެސެޖްތަކެއް ދައުރު ކުރަމުންދާތީ ޕީއެންސީން އެކަން ކުށްވެރިކޮށްފި އެވެ.
އެ ޕާޓީން މިއަދު ނެރުނު ބަޔާނެއްގައި ބުނީ ޕާޓީގެ ބޭނުމަށް ރަށްރަށުން އެއްވެސް މައުމޫލާތެއް ހޯދާ ނަމަ އެކަން ކުރާނީ ސީދާ ޕާޓީގެ ސްޓިއަރިން ކޮމިޓީ އާއި ޕާޓީގެ މައި އޮފީހުގެ އިތުރުން ޕާޓީގެ ރަސްމީ މަސްއޫލިއްޔަތެއް އޮތް ފަރާތަކުން ގުޅައިގެން ނުވަތަ ޕާޓީގެ ރަސްމީ ޕްލެޓްފޯމްތަކުން ކަމަށެވެ.
ޕީއެންސީން ބުނީ އެ ޕާޓީގެ ނަމުގައި ހިންގާ މިފަދަ ކަންކަން ފުލުހުންނަށް ހުށަހަޅައިގެން ވެސް ބަލާނެ ކަމަށެވެ. އަދި ޕާޓީގެ ނަމުގައި ސިޔާދީ ބޭނުމަށް ބަޔަކު ސައްހަ ނޫން މެސެޖްތައް ދައުރު ކުރުމަކީ ދަށު ދަރަޖައިގެ ކަމެއް ކަމަށް ބުންޏެވެ.
"ޕާޓީގެ މެންބަރުންނާއި އާންމު ރައްޔިތުންގެ ކިބައިން އެދެނީ މިފަދަ ސައްހަ ނޫން މެސެޖްތަކަށް އިޖާބަ ނުދިނުމަށާއި އެފަދަ މެސެޖެއް ލިބިއްޖެ ނަމަ ވަގުތުން ޕާޓީގެ ރަސްމީ އިދާރާ އަށް އެކަން އެންގުމަށް." ޕީއެންސީން ބުންޏެވެ.
މައުލޫމާތު ހޯދަން ކަމަށް ބުނެނ އެ ޕާޓީގެ ނަމުގައި ސައްހަ ނޫން މެސެޖްތަކެއް ދައުރު ކުރާ ވާހަކަ ޕީއެންސީން ކުށްވެރި ކުރި އިރު، އެ ޕާޓީ އަށް މި ފަހުން ގިނަ އަދަދެއްގެ ބަޔަކު ވަގަށް ވެއްދި މައްސަލަ ފެންމަތިވެފައިވެ އެވެ. އެގޮތުން ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރް) ޑޭޓާތަކަށް އެކްސެސްވެ މީހުންގެ ޒާތީ މައުލޫމާތު ވަގަށް ނަގައިގެން ޕާޓީ އަށް ވެއްދި މައްސަލަ ފުލުހުންނަށާއި އިލެކްޝަން ކޮމިޝަން (އީސީ) އަށް ވެސް ހުށަހަޅާފައިވެ އެވެ.