އަންނަ މެއި މަހުގެ ތެރޭގައި ޝޫޓިން ފަށަން ޕްލޭންކޮށްފައިވާ ޝާހްރުކް ޚާންގެ "ކިންގް" ގެ ބަތަލާއާ ބެހޭ ވާހަކަތަކެއް ދެކެވެން ފަށައިފި އެވެ.
ޝާހްރުކްގެ ދަރިފުޅު ސުހާނާ ޚާން ވެސް މުހިއްމު ރޯލެއް ކުޅެން ހަމަޖެހިފައިވާ މި އެކްޝަން ތުރިލާގެ ވަރުގަދަ ރޯލަކަށް ދީޕިކާ ޕަދްކޯން ނުވަތަ ކަރީނާ ކަޕޫރް ގެންނަން މިހާރު ވާހަކަތަކެއް ދެކެވެމުން އަންނަ ކަމަށް މީޑިއާތަކުން ބުނެ އެވެ. ނަމަވެސް މިކަމާ ގުޅޭ އެއްވެސް ވާހަކައެއް އެ ފިލްމުގެ ޑައިރެކްޓަރު ސިދާތު އާނަންދު ހިއްސާއެއް ނުކުރެ އެވެ.
"ކިންގް" އިން ކަރީނާ އަށް ފުރުސަތު ދީފި ނަމަ މި ފިލްމު ވާނީ ސިދާތުގެ ފިލްމެއް އޭނަ ކުޅޭ ފުރަތަމަ ފަހަރަށެވެ. ދީޕިކާ އަކީ ސިދާތު އެންމެ ފަހުން ގެނެސްދިން ދެ ފިލްމުގެ ވެސް ބަތަލާ އެވެ. އެއީ 2023 ގެ "ޕަތާން" އާއި މިދިޔަ އަހަރުގެ "ފައިޓާ" އެވެ. "ކިންގް" ގެ ބަތަލާއަކަށް ދީޕިކާ ނަގައިފި ނަމަ މި ފިލްމު ވަނީ މިދިޔަ އަހަރު އަލަތު ދަރިފުޅަށް ފަހު، ހުނަރުވެރި ބަތަލާ ކުޅޭ ފުރަތަމަ ފިލްމަށެވެ.
ސިދާތާ އެކީ ދީޕިކާ މަސައްކަތްކުރި ފުރަތަމަ ފިލްމަކީ 2008 ގެ "ބަޗްނާ އޭ ހަސީނޯ" އެވެ.
ފާހަގަކޮށްލަން ޖެހޭ ކަމަކީ ކަރީނާ އާއި ދީޕިކާ އަކީ ވެސް ޝާހްރުކާ އެކީ ކާމިޔާބު ފިލްމުތަކެއް ކުޅެފައިވާ ދެ ބަތަލާއިންކަމެވެ. ޝާހްރުކާ އެކީ ކަރީނާ ކުޅުނު ފިލްމުތަކަކީ "އަސޯކާ" އާއި "ރާ.ވަން" އެވެ. ދީޕިކާ ބޮލީވުޑަށް ނުކުތީ ވެސް ޝާހްރުކާ އެކީގަ އެވެ. އެއީ 2007 ގެ "އޯމް ޝާންތީ އޯމް" އިންނެވެ. އޭގެ ފަހުން ދެ ތަރިން އެކީގައި "ހެޕީ ނިއު ޔިއާ" އާއި "ޗެންނައި އެކްސްޕްރެސް" ވެސް ކުޅެފައިވެ އެވެ.
"ކިންގް" ގެ ބަތަލާއަކަށް ކަރީނާ ނުވަތަ ދީޕިކާ ނަގަން އުޅޭކަމުގެ ވާހަކަތަކެއް ދެކެވެމުން އަންނަ އިރު، ސޯޝަލް މީޑިއާގައި ޝާހްރުކްގެ ފޭނުން އަންނަނީ އޭނައާ އެކު ކުރިން ފިލްމެއް ނުކުޅޭ ބަތަލާއަކު ޑިމާންޑަށް ކުރަމުންނެވެ. އެގޮތުން ތައްބޫ ނުވަތަ ވިދިއާ ބާލަން ފަދަ ތަރިއެއް ނެގުން މާ ރަނގަޅު ކަމަށް ބައެއް މީހުން ބުނެފައިވެ އެވެ.
ރިޕޯޓްތައް ބުނާ ގޮތުން އަންނަ އަހަރު ސިނަމާތަކަށް ގެންނާނެ ކަމަށް ބެލެވޭ "ކިންގް" ގެ ވިލަން އަކީ އަބީޝެކް ބައްޗަނެވެ. އަދި މީގެ ކާސްޓްގައި މިދިޔަ އަހަރުގެ ބޮޑު ހިޓްގެ ތެރޭގައި ހިމެނޭ "މުންޖިއާ" ގެ ބަތަލު އަބޭ ވަރްމާ ވެސް ހިމެނޭ ކަމަށްވެ އެވެ.
"ކިންގް" އަކީ ޝާހްރުކްގެ ރެޑް ޗިލީސް އެންޓަޓައިންމަންޓާއި ސިދާތުގެ މާފްލިކްސް ފިކްޗާސް ގުޅިގެން ހަދާ ފިލްމެކެވެ.