ފަސްދޮޅަސް އަހަރު ފުރުމުގެ އެއް ދުވަސް ކުރިން މިއަދު އިންޑިއާގެ ތަރި އާމިރު ޚާންގެ އޭނަގެ އުފަން ދުވަސް ފާހަގަކޮށްފި އެވެ.
އެގޮތުން މީޑިއާތަކާ އެކު ބޭއްވި އިވެންޓެއްގައި ކޭކު ފަޅާފައިވެ އެވެ. އާމިރު ވަނީ އެ ހަފުލާގައި ބައިވެރިވި މީޑިއާތަކަށް ޝުކުރު ވެސް އަދާކޮށްފަ އެވެ. އާންމުކޮށް އާމިރަކީ މީޑިއާތަކާ އެކު އޭނަގެ އުފަން ދުވަސް ފާހަގަކުރާ އެކްޓަރެކެވެ.
އާމިރު ޚާންގެ އުފަން ދުވަހަކީ މާޗް 14 އެވެ. މީޑިއާތަކުން ކުރިން ރިޕޯޓްކޮށްފައިވާ ގޮތުގައި ބޮލީވުޑްގެ ގިަ ބަޔަކަށް ދައުވަތު ދީގެން މިރޭގެ ދަންވަރު އުފަން ދުވަހުގެ ހާއްސަ ޕާޓީއެއް ބާއްވާނެ އެވެ.
މިއަދު މީޑިއާތަކާ އެކު އާމިރު އުފަން ދުވަސް ފާހަގަކުރި، އެ ހަފުލާގެ ހައިލައިޓަކީ އާމިރާ އެކު އޭނަގެ އާ ލޯބިވެރިޔާ، ބެންގަލޫރަށް ނިސްބަތްވާ ގޯރީ ވެސް ބައިވެރިވުމެވެ، ނަމަވެސް މީޑިއާތަކަށް ގޯރީ ތައާރަފުކޮށް ދިނުމުގެ ކުރިން އާމިރު ވަނީ ގޯރީގެ އެއްވެސް ފޮޓޯއެއް ނުނެގުމާއި އޭނަގެ އެދުމަށް މީޑިއާތަކުން އިހުތިރާމު ކުރުމަށް ވެސް އެދިފަ އެވެ.
އާމިރުގެ ފުރަތަމަ ދެ ކައިވެނި ރޫޅިފައިވާ، ދެ ކައިވެންޏަށް ތިން ކުދިން ލިބިފައިވެ އެވެ. އެގޮތުން ފުރަތަމަ އަންހެނުން ރީނާ ދައްތާއާ 2001 ގައި ވަކިވި އިރު، އެ ކައިވެންޏަށް ދެ ދަރިން ލިބިފައިވެ އެވެ. އެއީ މިހާރު ފިލްމު ވެސް ކުޅެމުން އަންނަ ޖުނައިދު ޚާން، 31، އާއި މިދިޔަ އަހަރު ކައިވެނި ކޮށްފަވާ އިރާ ޚާން، 27، އެވެ.
އާމިރާއި ޑައިރެކްޓަރު ކިރަން ރާއޯ 2005 ގައި ކުރި ކައިވެނި 2021 ގައި ރޫޅައިލާ އިރު، ލިބިފައިވާ ދަރިފުޅު އާޒާދު ރާއޯ ޚާނަށް މިހާރު 12 އަހަރެވެ.
ކުރީގެ ދެ އަނބިންނާއި އާމިރާ ދެމެދު އަބަދު ވެސް ގާތް ގުޅުމެއް އޮވެ އެވެ.