ސަރުކާރަށް އުޅެނީ އިގްތިސާދު މެނޭޖްކުރަން ނޭނގިގެން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފްގެ ފްރޮންޓް އޮފީހުގެ ޖަލްސާގައި ރޭ ވާހަކަދައްކަވަމުން ޔާމީން ވިދާޅުވީ އިންފްލޭޝަން މިވަގުތު އުޅެނީ 8 ޕަސެންޓަށް ވުރެ މަތީގައި ކަމަށް ގަބޫލުކުރައްވާ ކަމަށާއި ސަރުކާރުން ފައިސާ ޗާޕުކޮށްފިނަމަ އިންފްލޭޝަންގެ އަދަދު އެއަށް ވުރެ ވެސް މައްޗަށް އަރައިގެންދިޔުމާއެކު ދިވެހި ފައިސާގެ ބާރު ދަށްވެގެންދާނެ ކަމަށެވެ.
ސަރުކާރުގެ އެއްވެސް ބޮޑު މަޝްރޫއެއް ރާއްޖޭގެ އެއްވެސް ހިސާބެއްގައި ނުހިނގާ ކަމަށާއި ޕްރައިވެޓް ސެކްޓާގެ ރިއަލް އެސްޓޭޓުގެ އެއްވެސް މަޝްރޫއެއް ވެސް ނުހިނގާ ކަމަށް ޔާމީން ވިދާޅުވި އެވެ. އިމްޕޯޓު ޑިއުޓީތަކަށް ބެލުމުން އެކަން ފެންނަމުންދާ ކަމަށާއި ޓޫރިޒަމް ދާއިރާގެ ވެސް އެއްވެސް އާ މަޝްރޫއެއް ނުހިނގާ ކަމަށްވެސް ވިދާޅުވި އެވެ.
"ދެން ކޮން ގްރޯތެއްތޯ މިތާ އޮތީ. ގްރޯތެއް މިތާކު ނެތޭ. ވަކިކޮޅަކަށް ފަހިކޮށްލާފައި އޮތް ދިޔަދޮއިއެއް މިއޮތީ. ހަމަ އަޅާ ހުރިހާ އެއްޗެއް ހަރުނުލާ ފައިބައިގެންދަނީ. އިގްތިސާދު މިއޮތީ ބޭރަށް ހިންގާފައި. ޑައިރިޔާ ޖެހިފައި މިއޮތީ، ހުއްޓުވެނޭ ގޮތެއް ނެތް،" ޔާމީން ވިދާޅުވި އެވެ.
ރާއްޖޭގެ އިގްތިސާދީ ހާލަތު ދަށްވަމުންދާއިރު ވެސް މިކަމުގެ ތެދު މައުލޫމާތު ދެއްވަން ފިނޭންސް މިނިސްޓަރު ނޫޅުއްވާ ކަމަށް ޔާމީން ވިދާޅުވި އެވެ. އަދި ދަރަނި "ހަބޭހަށް" އަރައިގެންދާއިރު ބޭރުން އެއްވެސް ފައިސާއެއް ރާއްޖެއަށް ނުގެނެވޭ ކަމަށާއި އަދި އެއްވެސް ގައުމަކުން ވެސް ރާއްޖެއަށް ފައިސާ ނުދޭ ކަމަށް ޔާމީން ވިދާޅުވި އެވެ.
ޔާމީން ވަނީ މި ހާލަތުގައި ސަރުކާރުން ފައިސާ ޗާޕުކޮށްފިނަމަ އެއީ އަނެއްކާވެސް "ރިހޭމައްޗަށް ފޮއި ވެއްޓުން" ކަމަށް ވިދާޅުވެފަ އެވެ.
"މި އުޅެނީ މެނޭޖްކުރަން ނޭނގިގެން. މިގޮތަކަށެއް މީތި މެނޭޖެއް ނުކުރެވޭނެ. މިފަހަރު ފައިސާ ޗާޕުކުރީ، މި ލާރިކޮޅު ހުސްވާނެ ދެ މަހެއްހާ ދުވަހު މުސާރަ ދޭއިރަށް. ދެން އަނެއްކާ ކޯއްޗެއް ވިއްކާލާނީ؟ ދިމްޔާތު ނޫނީ ދިވެހި ދިވެހި ދިދަ ވިއްކާލާނީ؟" ޔާމީން ވިދާޅުވި އެވެ.