ދެ އިންޖީނަކަށް ދިމާވި މައްސަލަތަކަކާއި ގުޅިގެން އައްޑޫ ހިތަދޫގެ ބޮޑު ބަޔަކުން ކަރަންޓް ކެނޑިއްޖެ އެވެ.
ފެނަކަ ހިތަދޫ ބްރާންޗުން ބުނީ ސެންޓްރަލް ޕަވާ ސްޓޭޝަންގެ ދެ އިންޖީނަކަށް ދިމާވި ޓެކްނިކަލް މައްސަލަތަކަކާ ގުޅިގެން ބައެއް ސަރަޙައްދުތަކުން ކުއްލިގޮތަކަށް ކަރަންޓުގެ ޚިދުމަތް މެދުކަނޑާލަން ޖެހިފައިވާ ކަމަށެވެ. ދިމާވި މައްސަލަ ދެނެގަތުމުގެ މަސައްކަތް ކުރަމުންދާ ކަމަށް ފެނަކަ އިން ބުނެ އެވެ.
ދެ އިންޖީނަކަށް ދިމާވި މައްސަލަތަކަކާއި ގުޅިގެން ހިތަދޫގެ ތިން ސަރަހައްދަކުން މިވަގުތު ކަރަންޓުގެ ހިދުމަތް ވަނީ މެދުކެނޑިފަ އެވެ. މިއަދު މެންދުރު ފަހު ފޭދޫން ވެސް ކަރަންޓް ކެނޑިފައިވެ އެވެ.
އައްޑޫ އަށް ދިމާވެފައިވާ ކަރަންޓުގެ މައްސަލަ ހައްލުކުރަން އެއް މެގަވޮޓްގެ ޖަނަރޭޓަރެއް ދާދިފަހުން ވަނީ ގެނެސްފަ އެވެ. އަދި އިންޑިއާއިން އިތުރު 1.8 މެގަވޮޓްގެ ޖެނަރޭޓަރު ސެޓެއް އައްޑޫއަަށް ގެންދިއުމަށް ވެސް އަންނަނީ މަސައްކަތް ކުރަމުންނެވެ.
އައްޑޫގެ ގުޅިފައިވާ އަވަށްތައް ކަމަށްވާ ހިތަދޫ، މަރަދޫ، މަރަދޫފޭދޫ އަދި ފޭދޫން ކަރަންޓް ކެނޑޭ މައްސަލަ މި ރޯދަ އަށް ހައްލު ކުރަން 1.8 މެގަވޮޓްގެ ޖެނެރޭޓަރެއް ގެނެސް ބޭނުން ކުރަން ފެށި ނަމަވެސް މައްސަލަ ހައްލެއް ނުވެ އެވެ.
ކަރަންޓުގެ މައްސަލައާ ގުޅިގެން ފެނަކައިގެ އިސްވެރިން މަޖިލީހުގެ އެސްއޯއީ ކޮމިޓީއަށް ހާޒިރުކޮށްދޭން މީގެކުރިން ހިތަދޫ މެދު ދާއިރާގެ މެމްބަރު އަހުމަދު އަޒާން ވަނީ ހުށަހަޅައިފަ އެވެ. އެ މައްސަލައާ ގުޅިގެން ފެނަކައިގެ އިސްވެރިން ހާޒިރުކުރަން ފާސްކުރި ނަމަވެސް މިހާތަނަށް އެ ކުންފުނީގެ ވެރިން ކޮމިޓީއަށް ގެނެސްފައެއް ނުވެ އެވެ.