Last Updated: April 5, 17:18
Saturday, April 5, 2025
ޚަބަރު

މިއީ މަސްވެރިންނަށް ހެޔޮ އެދޭ ސަރުކާރެއް ނޫން

އެމްޑީޕީ ޕާލިމެންޓަރީ ގްރޫޕުގެ ލީޑަރު އިބްރާހިމް ނާޒިލް - ފޮޓޯ: ރައްޔިތުންގެ މަޖިލިސް

މިއީ މަސްވެރިންނަށް ހެޔޮ އެދޭ ސަރުކާރެއް ނޫން ކަމަށް އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެ އެވެ.

އެމްޑީޕީން ސިލްސިލާ ގޮތެއްގައި މާލޭގައި މިހާރު ބާއްވަމުން އަންނަ އެއްވުންތަކުގެ ތެރެއިން ރޭގެ އެއްވުމުގައި ވާހަކަދައްކަމުން ނާޒިލް ވިދާޅުވީ ކުރީ ސަރުކާރުން ފައިސާއަށް ހިޔާނާތްތެރިވެފައިވާ ކަމަށް ބުނެ، މަސްވެރިންނަށް ފައިސާ ނުދީ މި ސަރުކާރުން ގާތްގަނޑަކަށް ތިން މަސް ދުވަހު ހިފަހައްޓާލައި މަސްވެރިންނަށް ދަތިކޮށްފައިވާ ކަމަށެވެ.

"މިހާރު މަސްވެރިން ބަނާ މަހަށް ފައިސާ ދެމުންދަނީ ބޭންކް އޮފް މޯލްޑިވްސް އިން ދަރަންޏަށް ފައިސާ ނަގައިގެން. ދުވަސްކޮޅަކަށް ދެވިދާނެ. ދެން ވާނެ ގޮތެއް މަސްވެރިންނަށް އަދި އެހާ ރަނގަޅަކަށް ސާފެއް ނޫން. މުއިއްޒު ވިދާޅުވި ގޮތަށް އަމަލުނުކުރާތީ މަސްވެރިން މި މުޒާހަރާއަށް ބައިވެރިވާންޖެހޭ. އަޅުގަނޑުމެން މިކުރި މަސައްކަތުން މިހާރު ވެސް އެލިބޭ އެއްޗެއް ލިބެނީ. މި އެމްޑީޕީ މީހުން މަސްވެރިންގެ ހައްގުގައި މިތާގައި ހުރި ފަޅުތެރޭގައި ހުރި ދޯނިތަކަށް އަރައި އެދެއްކި ވާހަކައާއި، އެކުރި ޑިމާންޑުތަކާއި ގުޅިގެން ލިބޭ އެއްޗެއް ލިބެނީ،" ނާޒިލް ވިދާޅުވި އެވެ.

ނާޒިލް ވިދާޅުވީ މަސްވެރިންގެ އަތުން މަސް ގަތުމަށްފަހު ރާއްޖެއިން ބޭރަށް މަސް ފޮނުވައި، ލިބޭ ޑޮލަރު ސަރުކާރުން ނަގަމުންދާ ކަމަށެވެ. އަދި މިއީ އެއްގޮތަކަށް ވެސް މަސްވެރިންނަށް ރަނގަޅަށް ކަމެއް ކޮށްދޭން ބޭނުންވެގެން އުޅޭ ސަރުކާރެއް ނޫން ކަމަށާއި އެގޮތން މި ސަރުކާރުން މަސްވެރިންނަށް ބޮޑެތި އަދަދުތަކުން ފައިސާދޭ ވާހަކަ އާންމުކުރަނީ އާންމު ރައްޔިތުންގެ މެދުގައި މަސްވެރިންނާމެދު ނުރަނގަޅު ތަސައްވުރެއް އުފެއްދުމަށް ކަމަށްވެސް ވިދާޅުވި އެވެ. ނަމަވެސް އެއީ މަސްވެރިން ކުރާ މަސައްކަތުން އެ މީހުންނަށް ދޭން ޖެހޭ އުޖޫރަކަން ނާޒިލް ފާހަގަކުރެއްވި އެވެ.