އާމިރު ޚާންގެ ފުރަތަމަ ފިލްމު "ގަޔާމަތު ސޭ ގަޔާމަތު ތަކް' ގެ ޑައިރެކްޓަރު މަންސޫރް ޚާން އޭނައާ އެކު އިތުރު ފިލްމެއް ހެދުމުގެ ތައްތާރީތައް ވާން ފަށައިފި އެވެ.
ބޮލީވުޑް ހަންގާމާ އަށް ދިން އިންޓަވިއުއެއްގައި މަންސޫރު ބުނީ އެ ފިލްމު ހަދަން ނިންމާފައި ވަނީ އޭނަ ލިޔެފައިވާ ދެ ފޮތުގެ ތެރެއިން "ވަން: ދަ ސްޓޯރީ އޮފް ދި އަލްޓިމޭޓް މިތު" އަށް ބިނާކޮށް ކަމަށެވެ. އެގޮތުން މިހާރު އޭގެ ސްކްރީންޕްލޭގެ ދެ ޑްރާފްޓެއް ނިންމާފައިވާ ކަމަށް ބުންޏެވެ.
މަންސޫރު ބުނި ގޮތުގައި ދެވަނަ ޑްރާފްޓަކަށް ދާން ޖެހުނީ ފުރަތަމަ ލިޔުނު ޑްރާފްޓާ މެދު އާމިރު ހިތްހަމަނުޖެހޭތީ ކަމަށެވެ.
"އެހެންވެ މިހާރު އަމާޒު ހިފާފައި މި ވަނީ ޖޫން އަށް ފައިނަލް ޑްރާފްޓް ނިންމަން. އަހަރެން ވަރަށް ބޭނުން މި ފިލްމު އާމިރާ އެކު ހަދަން. ފޮތް ވެސް ވީ އޭނަ އަށް ވަރަށް ކަމުދިޔަ އެއްޗަކަށް،" މަންސޫރު ބުންޏެވެ. "އެހެންވެ އޭނަ މީގެ ފައިނަލް ސްކްރީންޕްލޭއާ މެދު ހިތްހަމަނުޖެހޭ ކަމަށް ވަންޏާ އަހަރެން ބޭނުމެއް ނޫން ފިލްމު ހަދާކަށް. އެކަމަކު ފާހަގަކޮށްލަން ޖެހޭ ކަމަކީ މި ފޮތަކީ ސްކްރީންޕްލޭއަކަށް ބަދަލު ކުރަން ފުދޭ ވަރަކަށް އުނދަގޫ އެއްޗެއްކަން."
އޭނަ ބުނީ ފިލްމީ މަސައްކަތްތަކާ ދުރުގައި ހުންނަތާ ވަރަށް ގިނަ އަހަރުތަކެއްވެއްޖެ ކަމަށެވެ. ނަމަވެސް މިހާރު އަލުން އާ ފިލްމަށް ހުރިހާ ފޯކަސްއެއް އަމާޒުކޮށްފައިވާ ކަމަށް ބުންޏެވެ.
"ގަޔާމަތު ސޭ ގަޔާމަތު ތަކް" 1988 ގައި ގެނެސްދިން ދިނުމަށް ފަހު، އާމިރާ އެކު މަންސޫރު ގެނެސްދިން އިތުރު ފިލްމުތަކުގެ ތެރޭގައި 1992 ގެ "ޖޯ ޖީތާ ވޮހީ ސިކަންދަރު" އާއި 1995 ގެ "އަކޭލޭ ހަމް އަކޭލޭ ތުމް" ހިމެނެ އެވެ.
މިހާރު އުމުރުން 66 އަހަރުގެ މަންސޫރުގެ އެންމެ ފަހުގެ ފިލްމަކީ ޝާހްރުކް ޚާނާއި އައިޝްވާރިއާ ރާއީ ދެބެއިންގެ ރޯލު ކުޅުނު 2000 ވަނަ އަހަރުގެ "ޖޯޝް" އެވެ.
އާމިރާ އެކު މަންސޫރު ފިލްމެއް ތައްޔާރީތައްވާ އިރު، އިއްޔެ 60 އަހަރު ފުރުނު އެކްޓަރުގެ ފިލްމެއް މި އަހަރު ބެލުންތެރިންނަށް ގެނެސްދޭނެ އެވެ. އެއީ "ސިތާރޭ ޒަމީން ޕަރް" އެވެ. އާމިރުގެ އެންމެ ފަހުގެ ފިލްމަކީ 2022 ގެ "ލާލް ސިންގް ޗައްޑާ" އެވެ.