ޑައިރެކްޓަރު ސަންޖޭ ލީލާ ބަންސާލީއާ އެކު މަސައްކަތް ކުރުމަކީ ފަސޭހަ ކަމެއް ނޫން ކަމަށާއި އެކަމަކު އޭނައާ އެކީ މަސައްކަތް ކުރުމަކީ ވަރަށް ގިނަ ކަންކަން ދަސްވާ ކަމެއް ކަމަށް ރަންބީރް ކަޕޫރް ބުނެފި އެވެ.
އޭނަ މިހާރު އަންނަނީ ހުނަވެރި ޑައިރެކްޓަރުގެ އާ ފިލްމު "ލަވް އެންޑް ވޯ" ގެ މަސައްކަތް ކުރަމުންނެވެ މި ފިލްމަކީ ރަންބީރް ބޮލީވުޑަށް ނެރެން ބަންސާލީ 2007 ގައި ގެނެސްދިން "ސާވަރިއާ" އަށް ފަހު، ދެ މީހުން އެކީގައި މަސައްކަތްކުރާ ފުރަތަމަ ފިލްމެވެ.
އަންނަ އަހަރު ގެނެސްދޭން ހަމަޖެހިފައިވާ "ލަވް އެންޑް ވޯ" ގެ ބަތަލާ އަކީ ރަންބީރްގެ އަންހެނުން އާލިއާ ބަޓެވެ. އަދި މީގެ ކާސްޓްގައި ވިކީ ކޯޝަލް ވެސް ހިމެނެ އެވެ.
ބުރާސްފަތި ދުވަހު މީޑިއާތަކާ ވާހަކަ ދައްކަމުން ރަންބީރް ބުނީ ބަންސާލީހާ ޑެޑިކޭޓެޑް ޑައިރެކްޓަރަކު ނުދެކޭ ކަމަށެވެ.
"އަނެއްކާ ވަރަށް ބުރަކޮށް މަސައްކަތްކުރާ ޑައިރެކްޓަރެއް. އަހަރެން ނުދެކެން ފިލްމެއް ހަދާ ނަމަ އެ ފިލްމެއްގެ އެ ހުރިހާ ކަމަކަށް އެހާ ބޮޑަށް ފޯކަސްކުރާ ޑައިރެކްޓަރެއް،" އޭނަ ބުންޏެވެ. "ކެރެކްޓާތައް ބިލްޑްކުރުމާ ހަމައިން ފެށިގެން ގޮސް ފިލްމުތަކުގައި އިންޑިއާ ވަންތަކަން ދައްކުވައި ދޭން ބަންސާލީ ވަރުގެ މީހަކު ހަމަ ނެތް."
ރަންބީރް ބުނި ގޮތުގައި ބަންސާލީއާ އެކު މަސައްކަތް ކުރަން އުނދަގޫ އެންމެ ބޮޑު ސަބަބަކީ ކަންކަމުގެ ޑީޓެއިލަށް އޭނަ ދޭ ސަމާލުކަން ބޮޑުވުން ކަމަށެވެ.
"އޭނަ އަކީ އެކްޓަރުންގެ މެކްސިމަމް ނެރޭ ޑައިިރެކްޓަރެއް. އެހެންވީމާ ސެޓްގައި ކުރަން ޖެހޭ މަސައްކަތް ދިގުލައިގެން ދާނެ. ބަންސާލީ އަކީ ކޮންމެ ޝޮޓެއް އެންމެ ހިތްހަމަޖެހޭ ވަރުކޮށްފައި ނޫނީ ދޫކޮށް ނުލާ ޑައިރެކްޓަރެއް،" ރަންބީރް ބުންޏެވެ. "އެހެންވެ ބަންސާލީގެ ފިލްމެއްގައި މަސައްކަތް ކުރުމަކީ ވަރުބަލިވާ ކަމަކަށް ވިޔަސް، އޭނަގެ ސެޓްގައ ހޭދަކޮށްލެވޭ ކޮންމެ ހިނދުކޮޅަކީ އެތައް ކަމެއް ދަސްވެ، މީހާގެ އަމިއްލަ ނަފުސަށް އިތުރު ކުރިއެރުންތަކެއް ލިބޭ ކަމެއް."
އޭނަ ބުނި ގޮތުގައި "ލަވް އެންޑް ވޯ" އަކީ ފިލްމު ކުޅޭ ކޮންމެ މީހެއްގެ ވެސް ހުވަފެނީ ފިލްމަކަށް ވާނެ ކަމަށެވެ.
"އަހަރެން ވަރަށް އުފާކުރަން މި ފިލްމު ކުޅެން ފުރުސަތު ލިބުނީމަ. މިއީ ހަމަ ހުވަފެނީ ރޯލެއް." 2023 ގެ "އެނިމަލް" ގައި ވަރުގަދަ ރޯލެއް ކުޅެގެން ބޮޑު ސަމާލުކަމެއް ހޯދި އެކްޓަރު ބުންޏެވެ.