އައްޑޫ ސިޓީގެ ކުނި ނައްތާލުމުގެ މަސައްކަތް މިނިސްޓްރީ އޮފް އެންވަޔަރަމެންޓް އެންޑް އެނާޖީގެ ދަށަށް ބަދަލު ކޮށްފައިވާ ކަމަށް އެ މިނިސްޓްރީން ހޯމަ ދުވަހު ހާމަ ކޮށްފިއެވެ.
އެންވަޔަރަމެންޓް މިނިސްޓްރީން ހޯމަ ދުވަހު ކުރި އިއުލާނުގައި ބުނެފައި ވަނީ އައްޑޫ ސިޓީ އާއި މާލޭގެ ކުނި ނައްތާލުމުގެ މަސައްކަތް ސެޕްޓެންބަރު މަހުގެ އެއް ވަނަ ދުވަހުން ފެށިގެން އެ މިނިސްޓްރީގެ ދަށަށް ބަދަލު ކޮށްފައިވާ ކަމަށެވެ.
"ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނު ނަންބަރު 7/2010 ގެ 56 ވަނަ މާއްދާގެ (ށ) ގެ 42 ވަނަ މާއްދާގައި ބަޔާންކޮށްފައިވާ މާލެ ސިޓީ އަދި އައްޑޫ ސިޓީގެ ކުނި ނައްތާލުމާބެހޭ މަސައްކަތްތަކަކީ 1 ސެޕްޓެންބަރު 2015 އިން ފެށިގެން މިނިސްޓްރީ އޮފް އެންވަޔަރަންމަންޓް އެންޑް އެނަރޖީއިން ކުރާ މަސައްކަތެއްކަމުގައި ޢާންމުކޮށް އަންގައި އިޢުލާންކުރީމެވެ." މި މަހުގެ 1 ވަނަ ދުވަހު އެންވަޔަރަމެންޓް މިނިސްޓްރީ އިން ނެރުނު އިއުލާނުގައި ވެއެވެ.
އައްޑޫ ސިޓީގެ ކުނި ނައްތާލުމުގެ މަސައްކަތް އެންވަޔަރަމެންޓް މިނިސްޓްރީގެ ދަށަށް ބަދަލުކުރި އިރު ފާއިތުވި ރޯދަ މަހުގެ ތެރޭގައި އެންވަޔަރަމެންޓް މިނިސްޓްރީން ވަނީ އައްޑޫ ސިޓީގެ ކުނި ނައްތާލުމުގެ މަސައްކަތް އެމްއާރުޑީސީ އާއި ހަވާލު ކޮށްފައެވެ. އެހެން ނަމަވެސް އެމްއާރްޑީސީ އަށް އެ މަސައްކަތް އެކަށީގެންވާ ގޮތެއްގައި ނުކުރެވޭ ކަމަށް ބުނެ ގިނަ ބަޔަކު އެކަމަށް ފާޑުކިޔަމުން ގެންދާކަން ފާހަގަކޮށްލެވެއެވެ.