ރާއްޖޭގައި ނޫސްވެރިކަމުގެ މިނިވަންކަން އޮތީ ނުރައްކަލުގެ ތެރޭގައި ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ޝާހިދު މިހެން ވިދާޅުވީ ރައީސް ޑރ. މުހައްމަދު މުއިއްޒު، އަދަދު ނޫހުގެ ސީއީއޯ ހުސެއިން ފިޔާޒު މޫސާއަށް ގުޅުއްވައި އިންޒާރު ދެއްވި ކަމަށް ބުނާ މައްސަލައަކާ ގުޅިގެންނެވެ. އެ މައްސަލަ އަދަދު ނޫހުގެ ފަރާތުން ފުލުހަށް މިހާރު ވަނީ ހުށަހަޅާފަ އެވެ.
މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ ރައީސް މުއިއްޒު އާއި އެމަނިކުފާނުގެ ސަރުކާރުގައި ޑިމޮކްރަސީގެ އުސޫލުތަކާއި ހެޔޮވެރިކަމުގެ އުސޫލުތަކަށް އެއްވެސް އިޙްތިރާމެއް ނެތްކަމާއި، އަދި އެ އުސޫލުތަކަށް އިޙްތިރާމްކުރުމުގެ އެއްވެސް ނިޔަތެއް ވެސް ނެތްކަން ކަމަށެވެ.
ނޫސްވެރިކަމުގެ މިނިވަންކަން އޮތީ ނުރައްކަލުގެ ތެރޭގައި ކަމށާއި އަދި އުނދަގޫ މަސައްކަތުން ހޯދާފައިވާ ޑިމޮކްރެސީގެ ކާމިޔާބީތައް ވެސް އޮތީ ބޮޑު ނުރައްކަލެއްގެ ތެރޭގައި ކަމަށް ޝާހިދު ވިދާޅުވި އެވެ.
Utterly shocked!
It is very clear that the President and his government has no respect, nor any intention to respect the principles of democracy and good governance.
Press freedom is under threat!
Our hard earned democratic gains are under severe threat!
Maldives… https://t.co/bQIi2r88QF
— Abdulla Shahid (@abdulla_shahid) March 15, 2025
އަދަދު ނޫހުން ރޭ ނެރުނު ބަޔާނެއްގައި ބުނީ ރައީސް މުއިއްޒު ފިޔާޒަށް ގުޅުއްވީ، އެމްޑީޕީގެ އެއްވުމެއްގައި އެ ޕާޓީގެ މެންބަރަކު ރައީސުލްޖުމްހޫރިއްޔާގެ އާއިލާގެ ބޭފުޅަކާ ބެހޭ ގޮތުން ވާހަކަ ދައްކަވާފައިވާތީ އެކަމާ ކޯފާވެގެން ކަމަށެވެ. ފިޔާޒަށް ގުޅުއްވައި އަދަދު ނޫހާމެދު، އަދި ފިޔާޒްއާ މެދު އެޅުއްވެން އޮތް އެންމެ ހަރުކަށި ފިޔަވަޅެއް އަޅުއްވާނެ ކަމުގެ އިންޒާރު ރައީސް މުއިއްޒު ދެއްވި ކަމަށް ބަޔާނުގައިވެ އެވެ.
އެގޮތުން ކޯފާވެގެން ތުރުތުރުލާ އަޑަކުން ދެފަހަރު ތަކުރާރުކޮށް އެހެން ވިދާޅުވުމަށްފަހު "ތިންވަނަ ފަހަރަށް "އެޅެން އޮތް އެންމެ ހަރުކަށި ފިޔަވަޅު އަޅާނަން" މިހެން ވިދާޅުވުމަށްފަހު ފޯނު ބޭއްވެވީ ކަމަށް އެ ބަޔާނުގައި ބުނެފައިވެ އެވެ.
މީގެއިތުރުން އެ ބަޔާނުގައި ވަނީ އަދަދު ނޫހުގައި ޝާއިއުވެސް ނުކުރާ ހަބަރަކާ ގުޅިގެން ރައީސުލްޖުމްހޫރިއްޔާ ދެއްވި އިންޒާރަކީ ސަރުކާރުން އެދޭ ގޮތަށް އެ ނޫހުގެ ސިޔާސަތުތައް ބައްޓަން ނުކުރާތީ އޮންނަ ހިތްޕުޅު ހަމަނުޖެހުމުގައި ދެއްވި އިންޒާރެއް ކަމަށް ބުނެފަ އެވެ. އެހެންނަމަވެސް، އެއްވެސް ފަރާތަކުން ދޭ އިންޒާރަކަށް ނުވަތަ ދައްކާ ބިރަކަށް ޖެހިލުންވުމެއް ނެތި ނޫހުގެ މަސައްކަތް ކުރިއަށް ގެންދާނެ ކަމަށްވެސް ބަޔާނުގައި ވަނީ ބުނެފަ އެވެ.