މިދިޔަ ހުކުރު ދުވަހު ހަވީރުގެ ވަގުތެއްގައި މާވެޔޮމަގުން ނުރައްކާތެރި ހަމަލާއެއް ދީގެން ޒަހަމްވެފައިވާ ޤާނޫނީ ވަކީލް މަހްފޫޒް ސައީދު އަކީ ރާއްޖެ ޤާނޫނީ ނިޒާމުގެ ތެރެއިން ފާހަނގަކުރެވޭ މައްސަލަތައް އިސްލާހު ކުރުމަށް އަބަދުވެސް ބިނާކުރަނިވި ފާޑުކިޔަމުން އައި ފަރާތެކެވެ. މިގޮތުން ޕޯޑިއަމްތަކުގައި އާއި، އަމިއްލަ ބޮލްގް (www.mafoozsaeed.com) ގައި މަހްފޫޒު ސައީދުގެ ހިޔާލުތައް މެދުކެނޑުމެއްނެތި ފާޅުކުރަމުން އައިކަން ފާހަނގަކުރެވެއެވެ.
މަހްފޫޒު ސައީދު އެންމެ ބޮޑަށް ވަކާލާތު ކުރައްވާފައިވަނީ ދިވެހި ރާއްޖޭގެ ޝަރުޢީ ދާއިރާ ހަރުދަނާކޮށް، ފާހަނގަ ކުރެވިފައިވާ މައްސަލަތައް ހައްލު ކުރުމަށެވެ. މިގޮތުން ދުނިޔޭގެ ކުރިއަރާފައިވާ ޤައުމުތަކުގައި ކަންކަން ކުރެވެމުން އަންނަގޮތާއި، ރާއްޖޭގައި ކަންކުރެވެމުން އަންނަގޮތަށް ބަލާ އަމިއްލަ ބްލޮގްގައި ގިނަ ލިޔުންތަކެއް ލިޔުއްވާފައިވެއެވެ.
އައްޑޫލައިވްއަށް މައުލޫމާތު ދެމުން މަހްފޫޒުގެ އެކުވެރިއަކު ބުނިގޮތުގައި މަހްފޫޒް ސައީދު ފާހަނގަ ކުރެވިފައިވަނީ ހިތްވަރުގަދަ މުރާލި ވަކީލެއްގެ ގޮތުގައިކަމަށެވެ. އަދި ވަޅިޖަހާ މަރާލަފާނެ ކަމަށް ބިރު ނުގަންނަ ކަމަށާއި، ބިރު ގަންނަނީ ވަޅި ޖަހައިގެންވެސް މަރުނުވެ މަސައްކަތާއިގެން ނޫޅެވޭގޮތަށް އޮންނަންޖެހިދާނެތީ ކަމަށް މަހްފޫޒު ކުރިން ބުނެފައިވާ ކަމަށް އޭނާ ބުންޏެވެ.
"ވަޅި ޖަހާލާފާނެތީ ބިރެއް ނުގަންނަ ކަމަށް އަބަދުވެސް ބުނާނެ. އެކަމަކު އޭނާ ބިރު ގަންނަނީ ވަޅި ޖަހައިގެން މަރުނުވެ، މަސައްކަތާއިގެން ނޫޅެވޭ ގޮތަށް އޮންނަން ޖެހިދާނެތީ " ، މަހްފޫޒްގެ އެކުވެރިޔާ ބުންޏެވެ.
ބަޔަކު ކުރިމަތިކޮށްފާނެ ނުރައްކަލަކަށް ބެލުމެއްނެތި ކުރިއަށް ދިއުމުގެ އަޒުމުގައި ހުންނެވި މަހްފޫޒަށް ކަންދިމާވީވެސް އެހެންނެވެ. މަހްފޫޒު މަރާލުމަށް އޭނާގެ ބޮލަށް އަމާޒު ކުރި ހަމަލާއިން ފުރާނަ ސަލާމަތްވީ ނަސީބު ރަނގަޅުކަމުންނޭ ދެންނެވިދާނެއެވެ.
މަހްފޫޒް އަކީ މާލޭގައި ހިންގާ މާރާމާރީގެ މައްސަލަތަކާއި، އެހެންވެސް ޖިނާއީ މައްސަލަތަކުގައި ދިފާއީ ވަކީލެއްގެ ގޮތުގައި އެއްވެސް ވަރަކަށް މިހާތަނަށް ވަކާލާތު ކުރައްވާފައިވާ ފަރާތެއްނޫނެވެ. އަދި މާރާމާރީތައް ހުއްޓުވުމަށް ތަކުރާރުކޮށް އެކި ފޯރަމްތަކުގައި ވާހަކަ ދައްކާފައިވެއެވެ.
މާރާމާރީގެ ނުރައްކަލަކީ ކޮންމެ ދިވެއްސަކުވެސް ހުށަހެޅިފައިވާ ނުރައްކަލެއްކަމަށާއި، މިއަދު މިކަން ނުހުއްޓުވައިފި ނަމަ ކޮންމެ މީހަކުވެސް މިކަންކުރާ މީހުންގެ ޝިކާރައަކަށް ވެދާނެކަމަށް މަހްފޫޒް ބުނެފައިވެއެވެ. މިގޮތުން 07 ޑިސެމްބަރ 2014 ވަނަ ދުވަހު މާލެއިން މީހަކު މަރާލުމާއި ގުޅިގެން މަހްފޫޒު ކޮށްފައިވާ ޓްވީޓް ފާހަނގަކޮށްލެވެއެވެ. މި ޓްވީޓުގައި މަހްފޫޒު ބުނެފައިވަނީ "މިއަދު މަފާޒް.. މާދަމާ މަހްފޫޒް؟؟.. ރައްކާތެރިކަމެއް ނެތްކަން ޔަޤީން." މިހެންނެވެ.
މަހްފޫޒް މި ޓްވީޓްގައި ފާހަނގަ ކޮށްފައިވަނީ އެދުވަހު މާލޭގައި ހިނގި މާރާމާރީގައި މަރުވި މަފާޒް އަށް އިޝާރާތްކޮށެވެ.
މަފާޒް އެދުވަހު މަރުވިޔަސް މާދަން މަހްފޫޒުވެސް ހަމައެހެން މަރުވެދާނެ ކަމަށާއި، ރައްކާތެރިކަމެއް ނެތްކަމުގެ ކަންބޮޑުވުން ފާޅުކޮށްފައިވެއެވެ. މަފާޒްގެ މަރަށް ނުވަމަސް ފުރުނު ފަހުން މަހްފޫޒް މަރާލުމަށް މިވަނީ ހަމަލާދީފައެވެ. މިހަމަލާއިން މަހްފޫޒް ސަލާމަތްވި ނަމަވެސް، އެފަދަ މީހުންގެ ޝިކާރައަކަށް މަހްފޫޒު އަމިއްލަފުޅަށް އަންދާޒާ ކުރިގޮތަށް އޭނާ މިވަނީ ވެފައެވެ.
މަހްފޫޒަށް ދިން ހަމަލާގެ މައްސަލަ ފުލުހުން ތަހުގީގު ކުރަމުން ގެންދާއިރު މިހާތަނަށް މިމައްސަލައިގެ ތުހުމަތުގައި އެއްވެސް މީހަކު ފުލުހުންގެ ބެލުމުގެ ދަށަށް ގެންގޮސްފައެއް ނުވެއެވެ.