އިންޑިއާގެ ތަރިން ކަމަށްވާ ވަރޫން ދަވަނާއި ޖާންވީ ކަޕޫރް އެކީގައި ކުޅުނު ދެވަނަ ފިލްމު "ސަނީ ސަންސްކާރީ ކީ ތުލްސީ ކުމާރު" ބެލުންތެރިންނަށް ގެނެސްދޭން އާ ތާރީހެއް ހަމަޖައްސައިފި އެވެ.
ކަރަން ޖޯހަރްގެ ދަރުމާ ޕްރޮޑަކްޝަނުން ގެނެސްދޭ މި ފިލްމު ކުރިން އަންނަ މަހުގެ 18 ގައި ސިނަމާތަކަށް ގެންނަން ޕްލޭންކުރި ނަމަވެސް މިހާރު ފިލްމު ރިލީޒްކުރަން ތާވަލުކޮށްފައި ވަނީ ސެޕްޓެމްބަރު މަހުގެ 12 ގަ އެވެ.
"ސަނީ ސަންސްކާރީ ކީ ތުލްސީ ކުމާރު" އަކީ ޖާންވީ 2018 ގައި ބޮލީވުޑަށް ނެރުނު ފިލްމު "ދަޅަކް" ގެ ޑައިރެކްޓަރު ޝިޝާންކް ކައިތާންއާ އެކު އޭނަ މަސައްކަތް ކުރާ ދެވަނަ ފިލްމެވެ. އަދި މިއީ ވަރޫންއާ އެކީ ވެސް ޖާންވީ ކުޅޭ ދެވަނަ ފިލްމެވެ. އެ ދެ ތަރިން އެކީގައި ކުޅުނު ފުރަތަމަ ފިލްމަކީ ޑައިރެކްޓަރު ނިތޭޝް ތިވާރީގެ 2023 ގެ "ބަވާލް" އެވެ.
ޝިޝާންކްއާ އެކު ވަރޫން ކުރިން ވަރަށް ކާމިޔާބު ދެ ފިލްމެއްގެ މަސައްކަތްކޮށްފައިވެ އެވެ. އެއީ 2014 ގެ "ހަމްޓީ ޝަރުމާ ކީ ދުލްހަނިޔާ" އާއި 2017 ގައި ގެނެސްދިން އޭގެ ފޮލޯއަޕް "ބަދުރީނާތު ކީ ދުލްހަނިއާ" އެވެ.
ޝިޝާންކް އެންމެ ފަހުން ގެނެސްދިން ފިލްމަކީ ވިކީ ކޯޝަލާއި ކިއާރާ އަދުވާނީގެ އިތުރުން ބޫމީ ޕިޑްނޭކަރްގެ 2022 ގެ "ގޯވިންދާ ނާމް މޭރާ" އެވެ. އޭނަގެ ރޮމޭންޓިކް ކޮމެޑީއެެއްގެ ގޮތުގައި ގެނެސްދޭ "ސަނީ ސަންސްކާރީ ކީ ތުލްސީ ކުމާރު" ގެ ކާސްޓްގައި ސާނިއާ މަލްއުތުރާ އާއި ރޯހިތު ސަރަފާއި މަނީޝް ޕޯލް އަދި އަކްޝޭ އޮބެރޯއީ ވެސް ހިމެނެ އެވެ.
ވަރޫންގެ އެންމެ ފަހުގެ ފިލްމަކީ ޑިސެންބަރުގައި ރިލީޒްކުރި "ބޭބީ ޖޯން" އެވެ. އަދި ޖާންވީގެ އެންމެ ފަހުގެ ފިލްމަކީ މިދިޔަ އަހަރުގެ ސެޕްޓެމްބަރުގައި ރިލީޒްކުރި "ދޭވްރާ: ޕާޓް 1" އެވެ.