މި އަހަރުގެ ޕީކް ސީޒަނާ ދިމާކޮށް މާލެ ސަރަހައްދުގައި ކަރަންޓު ބޭނުންކުރާ މިންވަރު އިތުރުވާނެ ކަމަށް ލަފާކޮށް، ހުޅުމާލޭގައި ސްޓެލްލޯ އިން ގާއިމުކުރި ބެކަޕް އިންޖީނުގެ ހުޅުވައިފިއެވެ.
އެ މަސައްކަތަކީ ކުންފުނީގެ މުވައްޒަފުންގެ އެންމެ 10 ދުވަހުގެ މަސައްކަތެވެ. ބެކަޕް އިންޖީނުގެ 'އެނެކްސް 2' ހުޅުވާފައި ވަނީ 48،000 އަކަފޫޓުގެ ބިމެއްގައި އެވެ.
އެތަން ހުޅުވަން ރޭ ބޭއްވި ރަސްމިއްޔާތުގައި ސްޓެލްކޯގެ މެނޭޖިން ޑިރެކްޓަރު ޙުސެއިން ފަހުމީ ވިދާޅުވީ އެހެން އަހަރުތަކާއަޅާބަލާ އިރު މި އަހަރުގެ ރަމަޟާން މަހު، ކަރަންޓު ކެޕޭސިޓީ މައްޗަށްދާ މިންވަރު އިތުރުވާނެ ކަމަށް ލަފާ ނުކުރެވޭކަމަށެވެ. އެއީ ފަހު 10 އެއް ސަރުކާރު ބަންދުކުރުމާއި އަދި ސްކޫލް ޗުއްޓީއާއި ދިމާވުމުން ކަމަށް ވިދާޅުވި އެވެ. ނަމަވެސް ރަމަޟާން މަހަށް ފަހު އަންނަނީ ހޫނު މޫސުމުގެ ކަރަންޓު ޕީކްވާނެ ދުވަސްވަރުކަމަށް ބެލެވޭތީ ސްޓެލްކޯ އިން ތައްޔާރުވަމުން އަންނަ ކަމަށް ވިދާޅުވިއެވެ.
ސްޓެލްކޯއިން ހުޅުމާލޭގައި ޤާއިމުކުރި 'އެނެކްސް 2' އީންޖީނުގޭގައި 1.6 މެގަވޮޓްގެ ޖުމްލަ 12 ޖަނަރޭޓަރު ސެޓު ބެހެއްޓުމަށް ސްޓެލްކޯ އިން ނިންމާފައިވެ އެވެ. އޭ ގެތެރެއިން ހަތް ޖަނަރޭޓަރު ސެޓު މިހާރު ކޮމިޝަންކޮށް ބޭނުން ކުރަން ވަނީ ފަށައިފަ އެވެ. ބާކީ އަނެއް ފަސް ޖަނަރޭޓަރު ސެޓު ރޯދަ މަހުގެ ތެރޭގައި ގެނެވި ރޯދަ ނިމުމުގެ ކުރިން ކޮމިޝަންކޮށް ނިންމުމަށް ހަމަޖެހިފައިވާ ކަމަށް ވެސް ސްޓެލްކޯ އިން ބުންޏެވެ.
މިއާއެކު ހުޅުމާލޭ އިންޖީނުގޭގެ އިންސްޓޯލްޑް ކެޕޭސިޓީ 19.2 މެގަވޮޓަށް އަރާނެ އެވެ.