މާލޭގެ ޑެޕިއުޓީ މޭޔަރަކަށްމާފަންނު ހުޅަނގު އުތުރު ދާއިރާގެ ކައުންސިލަރު މުޙައްމަދު އަރީޝް މިއަދު އިންތިޚާބުކޮށްފި އެވެ.
އަރީޝް މި މަގާމަށް އިންތިޚާބުކުރީ މިއަދު އޮތް މާލެ ސިޓީ ކައުންސިލުގެ ހަތަރު ވަނަ ދައުރުގެ 188 ވަނަ ރަސްމީ އާންމު ޖަލްސާގައެވެ. ކައުންސިލަރުންގެ ތެރެއިން ޑެޕިއުޓީ މޭޔަރުކަމަށް ކުރިމަތިލެއްވީ ވެސް އަރީޝް އެކަންޏެވެ. އިންތިޚާބުގައި 16 ކައުންސިލަރުން ބައިވެރިވި އިރު، އެ ހުރިހާ މެންބަރުން ވެސް ވޯޓު ދިނީ އަރީޝް މަގާމަށް ހޮވުމަށެވެ.
އަރީޝް އަކީ ސިޓީ އެމްޑީޕީގެ މެންބަރެއްގެ ގޮތުގައި ކައުންސިލަށް ހޮވިވަޑައިގަތް ބޭފުޅެކެވެ. ނަމަވެސް ކުރިން މޭޔަރުގެ މަގާމުގައި ހުންނެވި މިހާރުގެ ރައީސުލްޖުމްހުރިއްޔާ ޑރ. މުޙައްމަދު މުއިއްޒް 2023 ގެ ރިޔާސީ އިންތިހާބު ކާމިޔާބު ކުރެއްވުމާ އެކު އޭނަ ވަނީ ޕީއެންސީ އަށް ސޮއި ކުރައްވައިފަ އެވެ.
މާލޭގެ ޑެޕިއުޓީ މޭޔަރުކަމުގެ މަގާމު ހުސްވީ އެ މަގާމުގައި ކުރިން ހުންނެވި މާފަންނު މެދު ދާއިރާގެ ކައުންސިލަރު އަހުމަދު ނަރީޝް މި މަހުގެ 12 ގައި އިސްތިއުފާ ދެއްވުމުންނެވެ.
އޭނަ މިހާރު ވަނީ ޔޫތު މިނިސްޓްރީގެ އެޑްވައިޒަރަކަށް މިނިސްޓަރެއްގެ ފެންވަރުގައި އައްޔަންކޮށްފަ އެވެ.
މާލޭގެ މިހާރުގެ މޭޔަރަކީ އެމްޑީޕީ އަށް ނިސްބަތްވާ އާދަމް އާޒިމެވެ.