Last Updated: April 4, 17:40
Friday, April 4, 2025
މުނިފޫހިފިލުވުން

ޝީލާ ބުނަނީ ސޮބާ އަކީ "ރާއްޖޭގެ މިތުން" އޭ!

ކުރީގެ އެކްޓަރު ހުސައިން ސޮބާއާ އެކު އަލަށް ފިލްމެއްގެ މަސައްކަތް ކުރަމުން އަންނަ އިރު، ބަތަލާ ޝީލާ ނަޖީބު ވަނީ "ރާއްޖޭގެ މިތުން" ގެ ގޮތުގައި ސޮބާ ސިފަކޮށްފަ އެވެ.

އެ ދެ މީހުން އެކީގައި މަސައްކަތް ކުރަމުން އަންނަ ޑައިރެކްޓަރު ފާތުމަތު ނަހުލާގެ "ސޮރީ" ގެ ސެޓުން ނަގާފައިވާ ވީޑިއޯއެއްގައި އިންޑިއާގެ މަޝްހޫރު އެކްޓަރު މިތުން ޗަކްރަބަތީގެ ގޮތުގައި ޝީލާ، ސިފަ ކުރުމުން އޭނަ ހިނިފަޅައިގެންދާ ތަން ވެސް ފެނެ އެވެ.

ޝީލާ ބުނީ "ސޮބާ ކަހަލަ ލެޖެންޑަކާ އެކީ މަސައްކަތް ކުރެވޭތީ ވަރަށް އުފަލުން ހުރި" ކަމަށެވެ.

ވީޑިއޯ އިން އެ ދެ މީހުންނާ އެކު ނަހުލާ ވެސް ފެނެ އެެވެ. އޭނަ ވެސް ޝީލާ ސިފަކުރީ ދެގޮތެއް ނުވާ 'ލެޖެންޑެއް' ގެ ގޮތުގަ އެވެ. ޝީލާ ބުނީ "ސޮރީ" އަކީ ވަރަށް އުންމީދު ކުރެވޭ ރަނގަޅު ފިލްމަކަށް ވާނެ ކަމަށެވެ.

ކާސްޓްގައި ޔޫސުފް ޝަފީއު (ޔޫއްޕެ) އާއި މަރިޔަމް އައްޒަގެ އިތުރުން ކުޑަ ދެ އަންހެން ކުދިން ވެސް ހިމެނޭ "ސޮރީ" އަކީ ނަހުލާގެ ސިގްނޭޗާ ސްޓައިލްގައި ގެނެސްދޭ ރޮއްވައިލާ ކަހަލަ އަސަރު ގަދަ ލޯބީގެ ފިލްމެކެވެ.

މި ފިލްމު އޮލިމްޕަހަށް ގެންނަން ނިންމާފައި ވަނީ މި އަހަރުގެ ޖޫން 17 ގަ އެވެ.