އެމްޑީޕީން ސިލްސިލާ ގޮތެއްގައި މާލޭގައި ކުރަމުން އަންނަ މުޒާހަރާތަކާ ގުޅިގެން އެމްޑީޕީގެ އިތުރު އެކްޓިވިސްޓުންތަކެއް ފުލުހަށް ހާޒިރުކުރަން ނިންމައިފި އެވެ.
މާދަމާ މެންދުރުގެ އެކި ވަގުތުތަކުގައި ފުލުހަށް ހާޒިރުވާން އަންގާފައިވަނީ އެމްޑީޕީގެ އެކްޓިވިސްޓުން ކަމަށްވާ ހަދީޖާ މުހައްމަދު އަދި ފާތިމަތު ޝިއުނާ އަދި ރީސާ އަހުމަދަށެވެ.
މި ފަރާތްތައް ފުލުހަށް ހާޒިރުކުރަނީ ގާނޫނާ ހިލާފަށް މާލޭގެ އެކި ސަރަހައްދުތަކަށް އެއްވެ އަޑުގަދަކޮށް މުޒާހަރާ ކުރުމުގެ އިތުރުން އާންމު ދަތުރުފަތުރަށް ދަތިވާ ގޮތަށް އަމަލު ކުރުމާއި ފުލުހުންގެ ވާޖިބު އަދާ ކުރުމަށް ހުރަސް އެޅި ކަމުގެ ތުހުމަތުގަ އެވެ.
މުޒާހަރާ ކުރުމަކީ ޤާނޫނު އަސާސީއިން ލިބިފައިވާ އަސާސީ ހައްގެއް.
މި ހައްޤަށް ހުރަސްއެޅުމުގެ ގޮތުން ފުލުހުން މަގުތަކުގަ ބެރިކޭޑް ޖަހާފަ މި ޕާޓީގެ ހިއްވަރުގަދަ އަންހެނުންނަށް ބިރުދައްކަން ފުލުފުލުގަ ޗިޓު ފޮނުވާ ފުލުަހަށް ހާޒިރުކުރަމުންދާމައްސަލަ ހަރުކަށިއިބާރާތުން ކުއްވެރިކުރަން. pic.twitter.com/CM4FetQg59— MDP Womens Wing (@MDPWomensWing) March 16, 2025
މުޒާހަރާތަކާ ގުޅިގެން ފާއިތުވި ދެ ދުވަހު ވެސް އެމްޑީޕީގެ އެކްޓިވިސްޓުންތައް ފުލުހަށް ހާޒިރުކޮށް ވަނީ ބަޔާން ނަގާފަ އެވެ.
އެގޮތުން މަކުނުދޫ ދާއިރާގެ ކުރީގެ މަޖިލިސް މެންބަރު، މުހައްމަދު ރާއީ އާއި އާރުޑީސީގެ ކުރީގެ މެނޭޖިން ޑިރެކްޓަރު، މޫސާ އަލީ މަނިކުގެ އިތުރުން އަހުމަދު އަލީމް (މާޒް ސަލީމް) މީގެ ކުރިން ވަނީ ފުލުހަށް ހާޒިރުކޮށްފައިވެ އެވެ.