އއ. މާޅޮހުގައި 500 މީހުންގެ ޖާގައިގެ މިސްކިތެއް އިމާރާތް ކުރަން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ހަވާލުކޮށްފި އެވެ.
އެކަމުގެ އެއްބަސްވުމުގައި މިއަދު އެއްބަސްވުމުގައި މިނިސްޓްރީގެ ފަރާާތުން ސޮއިކުރެއްވީ މިނިސްޓަރު ޑރ. މުޙައްމަދު ޝަހީމް އަލީ ސަޢީދެވެ. އާރުޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ބްރިގޭޑިއަ ޖެނެރަލް ރިޓަޔާޑް އަލީ ޒުހައިރެވެ.
މިނިސްޓްރީން ބުނީ މާޅޮހުގައި އިމާރާތް ކުރާ އާ މިސްކިތްތަކުގައި ސޯލާ އާއި އޭސީ ހަރުކޮށް ވިނައިލް ފްލޯރިން އަޅާނެ ކަމަށާއި އެތަނުގައި ޤުރުއާން ކިޔަވައިދޭ ކުލާހެއް ހިމެނޭނެ ކަމަށެވެ.
އިސްލާމިކް މިނިސްޓްރީން އިއްޔެ ވެސް ވަނީ 11 ރަށެއްގައި މިސްކިތްތަކެއް އިމާރާތް ކުރަން ދެ ކުންފުންޏަކާ ހަވާލުކޮށްފަ އެވެ. އެގޮތުން ފެނަކައާ 8 ރަށެއް އަދި އެމްޓީސީސީއާ ތިން ރަށެއްގެ މަޝްރޫއު ހަވާލުކޮށްފައިވެ އެވެ.
އެ ރަށްތަކަކީ ތ. ހިރިލަންދޫ، އައްޑޫ ފޭދޫ، ނ. ހެނބަދޫ، ތ. ވޭމަންޑޫ، ރ. އިނގުރައިދޫ، ހދ. ނެއްލައިދޫ ބ. ކުޑަރިކިލި، ހއ. ބާރަށް، ބ. މާޅޮސް، އއ. ފެރިދޫ އަދި ށ. ނޫމަރާ އެވެ.