ވަރަށް ގިނަ އަހަރުތަކެއް ފަހުން އައްޑޫ ފޭދޫގައި ސަރުކާރުގެ ހަރަދުގައި މިސްކިތެއް އިމާރާތް ކުރަން ހަމަޖެހިއްޖެ އެވެ.
އެ މިސްކިތަކީ ފޭދޫގެ ހިއްކި ބިމުގައި ބިނާކުރަން ހަމަޖެހިފައިވާ 500 މީހުންގެ ޖާގައިގެ ޒަމާނީ މިސްކިތެކެވެ.
އިސްލާމިކް މިނިސްޓްރީން އިއްޔެ 11 ރަށެެއްގައި މިސްކިތް އިމާރާތްކުރަން ދެ ކުންފުންޏަކާ ހަވާލުކުރި ފޭދޫގެ އާ މިސްކިތް ހަވާލުކޮށްފައި ވަނީ ފެނަކައާ އެކު އެވެ. ފޭދޫ ހިމެނޭހެން އެ ކުންފުންޏާ ހަވާލުކުރީ 8 ރަށެއްގެ މިސްކިތްތެކެވެ. އެއީ ތ. ހިރިލަންދޫ، ނ. ހެނބަދޫ، ތ. ވޭމަންޑޫ، ރ. އިނގުރައިދޫ، ހދ. ނެއްލައިދޫ އަދި ބ. ކުޑަރިކިލު އަދި އި 500 މީހުންގެ ޖާގައިގެ ށ. ނޫމަރާ އެވެ.
ނޫމަރާގައި 300 ޖާގައިގެ މިސްކިތެއް އިމާރާތްކުރާ އިރު، އެހެން ހުރިހާ ރަށެއްގައި އިމާރާތް ކުރަން ހަމަޖެހިފައި ވަނީ 500 މީހުންގެ ޖާގައިގެ މިސްކިތްތަކެވެ.
އައްޑޫގައި ދެވަނަ އަށް އެންމެ ބޮޑު އާބާދީ އޮންނަ ފޭދޫގައި ސަރުކާރުން އާ މިސްކިތެއް އިމާރާތް ކުރަން ނިންމި އިރު، އެ އަވަށުގައި މިހާރު 7 މިސްކިތް ހުރެ އެވެ. މީގެ ތެރެއިން ގިނަ މިސްކިތްތަކަކީ އަމިއްލަ ފަރާތްތަކުން ބިނާކޮށްފައިވާ މިސްކިތްތަކެވެ. ފޭދުގައި އެންމެ ފަހުން ހުޅުވި މިސްކިތަކީ ރާއްޖޭގެ މަޝްހޫރު ވިޔަފާރި ކުންފުނި ހެޕީ މާކެޓްގެ ވެރިޔާ އަދި ފޭދު އަށް ނިސްބަތްވާ މުހައްމަދު ނައީމު ބިނާކޮށް 2019 ގައި ހުޅުވި "މަސްޖިދު ކައުސަަރު" އެވެ.