އެމްޑީޕީގެ އެކްޓިވިސްޓު މަރިޔަމް ޒުބައިރު (މަންދީ)ގެ ގަޔަށް މިރޭ ކަޅުތެޔޮ ޖަހައިފި އެވެ.
މައުލޫމާތު ލިބިފައިވާ ގޮތުގައި މަންދީގެ ގަޔަށް ކަޅުތެޔޮ ޖަހާފައިވަނީ ހެލްމެޓް އަޅައިގެން ސައިކަލެއްގައި ދިޔަ ބަޔެކެވެ. ފުލުހުން އަންނަނީ އެ ސަރަހައްދުގައި މިހާރު ހަރަކާތްތެރިވަމުންނެވެ.
މަންދީގެ ގަޔަށް ކަޅުތެޔޮ ޖަހާފައިވާއިރު ރާއްޖޭގައި ވޭޕް މަނާކޮށްފައި ވަނީ، ރައީސް ޑރ. މުހައްމަދު މުއިއްޒުގެ ދަރިކަލަކު އެތަކެތި ބޭނުންކުރާތީ ކަމަށް ބުނެ އެމްޑީޕީ މުޒާހަރާއެއްގެ ތެރެއިން މަންދީ ތުހުމަތުކުރި މައްސަލަ ވެސް ވަނީ ހޫނުވެފަ އެވެ.
މި ވާހަކަތަކާއި ގުޅިގެން ރައީސްގެ އާއިލާގެ ފަރާތުން ވަނީ މަންދީ އާއި އެމްޑީޕީގެ ޗެއާޕާސަން ފައްޔާޒް އިސްމާއީލާއި އެ ޕާޓީގެ މައްޗަށް ދައުވާކުރަން ނިންމާފަ އެވެ.
މީގެއިތުރުން އެމްޑީޕީން މިހާރު މާލޭގައި ސިލްސިލާ ގޮތެއްގައި ބާއްވަމުން އަންނަ މުޒާހަރާތަކާ ގުޅިގެން މަންދީ ވަނީ މިއަދު ފުލުހަށް ހާޒިރުކޮށްފަ އެވެ. އަދި އަންނަ އަންގާރަ ދުވަހު ވެސް ފުލުހަށް ހާޒިރުވާން މަންދީއަށް ވަނީ އަންގައިފަ އެވެ.