Last Updated: April 5, 07:00
Saturday, April 5, 2025
ޚަބަރު

ސަރުކާރު ބަލިކަށި ވަނީ ހީކުރި ވަރަށް ވުރެ ބާރަށް

އެމްޑީޕީގެ ޗެއާޕާސަން ފައްޔާޒު އިސްމާއިލް - ފޮޓޯ: އެމްޑީޕީ

ސަރުކާރު ބަލިކަށިވަމުން ދަނީ ހީކުރި ވަރަށްވުރެ ބާރަށް ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.

ފައްޔާޒު މިހެން ވިދާޅުވީ އެމްޑީޕީގެ އެކްޓިވިސްޓު މަރިޔަމް ޒުބައިރު (މަންދީ)ގެ ގަޔަށް ރޭ ކަޅުތެޔޮ ޖެހުމާ ގުޅިގެންނެވެ. މަންދީގެ ގަޔަށް ކަޅުތެޔޮ ޖަހާފައިވަނީ ހެލްމެޓް އަޅައިގެން ސައިކަލެއްގައި ދިޔަ ބަޔެކެވެ.

އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ މަންދީ އަށް ފިނޑި ބަޔަކު ދިން ހަމަލާ ކުށްވެރިކުރާ ކަމަށާއި ދައުލަތުގެ ނިޒާމުތައް ހަރާބުކޮށް، މުޅި ގައުމު ފުނޑުފުނޑު ކޮށްލާއިރު ރައްޔިތުން ބަލަން ނުތިބޭނެ ކަމަށެވެ. އަދި ހިތްވަރު ގަދަ ކަނބަލުން އަބަދުވެސް އިސްވެ ތެދުވާނެ ކަމަށާއި ޔަގީނުންވެސް ބިރަކަށް ނުގުޑާނެ ކަމަށްވެސް ފައްޔާޒު ވިދާޅުވި އެވެ.

"އަމުދުން ތިޔަ ކަހަލަ ފިނޑި އަމަލުތަކުން އެ ކަނބަލުން ފަހަތަކަށްވެސް ނުޖެއްސޭނެ. ސަރުކާރު ބޭޒާރުވެ ބަލިކަށިވަމުން މިދަނީ ހީކުރި ވަރަށްވުރެ ވެސް ބާރަށް،" ފައްޔާޒު ވިދާޅުވި އެވެ.

މަންދީގެ ގަޔަށް ކަޅުތެޔޮ ޖަހާފައިވާއިރު ރާއްޖޭގައި ވޭޕް މަނާކޮށްފައި ވަނީ، ރައީސް ޑރ. މުހައްމަދު މުއިއްޒުގެ ދަރިކަލަކު އެތަކެތި ބޭނުންކުރާތީ ކަމަށް ބުނެ އެމްޑީޕީ މުޒާހަރާއެއްގެ ތެރެއިން މަންދީ ތުހުމަތުކުރި މައްސަލަ ވެސް ވަނީ ހޫނުވެފަ އެވެ.

މި ވާހަކަތަކާއި ގުޅިގެން ރައީސްގެ އާއިލާގެ ފަރާތުން ވަނީ މަންދީ އާއި އެމްޑީޕީގެ ޗެއާޕާސަން ފައްޔާޒް އިސްމާއީލާއި އެ ޕާޓީގެ މައްޗަށް ދައުވާކުރަން ނިންމާފަ އެވެ.

މީގެއިތުރުން އެމްޑީޕީން މިހާރު މާލޭގައި ސިލްސިލާ ގޮތެއްގައި ބާއްވަމުން އަންނަ މުޒާހަރާތަކާ ގުޅިގެން މަންދީ ވަނީ މިއަދު ފުލުހަށް ހާޒިރުކޮށްފަ އެވެ. އަދި އަންނަ އަންގާރަ ދުވަހު ވެސް ފުލުހަށް ހާޒިރުވާން މަންދީއަށް ވަނީ އަންގައިފަ އެވެ.