ބ. ކަމަދޫގައި ހިންގާ ގެސްޓުހައުސްތަކަށް ޒިޔާރަތްކޮށް މައުލޫމާ ތުދިނުމުގެ ޕްރޮގްރާމެއް އެ ރަށުގެ ޕޮލިސް ޕޯސްޓުން ހިންގައިފި އެވެ.
އިއްޔެ ހިންގި އެ ޕްރޮގްރާމުގައި، ގެސްޓުހައުސްތަކަށް ޒިޔާރަތްކޮށް އެ ތަންތަނުގެ އިސް ފަރާތްތަކަށް މައުލޫމާތު ދީފައިވެ އެވެ. އެގޮތުން، އާންމުން ދިރިއުޅޭ ސަރަހައްދުތަކުގެ އާންމު އުސޫލުތަކާއި ޓޫރިސްޓުން އެ ސަރަައްދުތަކުގައި އުޅޭއިރު ސަމާލުކަން ދޭން ޖެހޭ ކަންކަމުގެ މައުލޫމާތު ހިއްސާކޮށްފައިވެ އެވެ. އެގޮތުން ރޯދަ މަހުގެ ދުވާލުގެ ވަގުތުތަކުގައި ޓޫރިސްޓުން ރަށުތެރޭގައި ކާބޯތަކެއްޗާއި ސިނގިރެޓް ފަދަ ތަކެތި ބޭނުން ނުކުރުމަށާއި ނިވާކަން ކުޑަ ހެދުން އަޅައިގެން ރަށުތެރޭގައި ނޫޅުމަށް އަންގައި ދިނުމަށް ގެސްޓްހައުސް ހިންގާ ފަރާތްތަކުގައި އެދިފައުވެ އެވެ.
ކަމަދޫ ޕޮލިހުން ބުނީ ޕްރޮގްރާމަށް ގެސްޓުހައުސްތަކުން ވަރަށް ބޮޑު އެއްބާރުލުމެއް ލިބުނު ކަމަށެވެ.
މި ރޯދައާ ދިމާކޮށް ލޯކަލް މިނިސްޓަރު އާދަމް ޝަރީފު ވެސް ވަނީ އާންމުން ދިރިއުޅޭ ރަށްރަށުގައި ރޯދަ މަހު ގެސްޓުންނަށް ހިދުމަތްދޭ އިރު، ހާއްސަ ސަމާލުކަމެއް ބެހެއްޓުމަށް އިލްތިމާސްކުރައްވައިފަ އެވެ. އެގޮތުން ދުވާލުގެ ވަގުތުތަކުހައި އާންމު ތަންތަނުގައި ޓޫރިސްޓުންނަށް ކާންބޯން ދިނުމުހެ ހިދުމަތް ނުދޭން އެދިވަޑައިގެންފައިވެ އެވެ.
ރާއްޖޭގެ ވަރަށް ގިނަ ރަށްރަށަށް ލޯކަލް ޓޫރިޒަމް ތައާރަފުވެފައިވާ އިރު، ވަރަށް ގިނަ ރަށްރަށުގައި މިހާރު ގެސްޓްހައުސްތައް ހިންގަ އެވެ.