Last Updated: April 3, 22:50
Thursday, April 3, 2025
ޚަބަރު

ބްރޯޑްކޮމްގެ ނައިބު އިސްތިއުފާ ދީފި

ބްރޯޑްކާސްޓިން ކޮމިޝަންގެ ނައިބު ރައީސް މުޙައްމަދު ފަޒީން އިސްތިއުފާ ދެއްވައިފި އެވެ.

އޭނަ މިއަދު އިސްތިއުފާ ދެއްވީ ބްރޯކޮމްގެ އަންހެން މުވައްޒަފަކަށް ފަޒީން ޖީންސީ ގޯނާކުރިކަމުގެ ތުހުމަތު ކުރެވި އޭނަމަގާމުން ވަކިކުރުމުގެ މައްސަލަ ރައްޔިތުންގެ މަޖިލީހުން ބަލަމުން ދަނިކޮށް، އެ ތުހުމަތުތަކަށް އިންކާރުކުރުމަށް ފަހު އެވެ.

ފަޒީންގެ އިސްތިއުފާގެ ސިޓީ ވެސް މިއަދު ވަނީ ރައީސް ޑރ. މުހައްމަދު މުއިއްޒަށް ހުށަހަޅައިފަ އެވެ. ސިޓީގައި އޭނަ ވިދާޅުވީ ބްރޯޑްކޮމްގެ މެންބަރެއްގެ ޒިންމާތަކާއި މަސްއޫލިއްޔަތުތައް މިނިވަންކަމާއެކު، ވަކި ފަރާތަކަށް ނުޖެހި އަދާކުރުމަކީ މިހިނދަށް ވެވެން ނެތް ކަމެއްކަމުގައި ދެކޭތީ އެ މަގާމުން އޭނާ އިސްތިއުފާ ދީފައިވާ ކަމަށެވެ. ނަމަވެސް ނޫސްވެރިކަމަށް އަންނަ ހަމަލާތައް ދިފާއުކުރުމާއި، މިނިވަން ދިމިގްރާތީ މުޖުތަމައުއެއް ދެމެހެއްޓުމަށްޓަކައި ނޫސްވެރިކަމުގެ މިނިވަންކަމަށް ކެނޑިނޭޅި މަސައްކަތް ކުރާ މީހެއްގެ ގޮތުގައި ދެމިހުންނާނެ ކަމަށް ބުނެފައިވެ އެވެ.

ކުރިން ނޫސްވެރިއެއްގެ ގޮތުގައި މަސައްކަތް ކުރަމުން އައި ފަޒީން ބްރޯޑްކޮމަށް އައްޔަންކުރީ މާޗް 7، 2021 ގަ އެވެ.