ބެލުންތެރިންގެ ވަރަށް ބޮޑު މަގުބޫލު ކަމެއް ހޯދި ތެލެގޫ ފިލްމު "ޕުޝްޕާ" ގެ ޑައިރެކްޓަރު ސުކުމާރުގެ ފިލްމެއް ޝާހްރުކް ޚާނަށް ހުށަހަޅާފައިވާ ކަމަށް ރިޕޯޓައް ބުނެފި އެވެ.
މިޑް-ޑޭ އިން ބުނި ގޮތުގައި ޝާހްރުކަށް ހުށަހެޅީ އިޖުތިމާއީ ގިނަ މައްސަލަތަކެއްގެ މައްޗަށް ވެސް އަލިއަޅުވާލައިގެން ހަދަން ނިންމާފައިވާ ރަށްފފުށުގެ ޕޮލިޓިކަލް ޑްރާމާއެކެވެ. އެ ނޫހުން ބުނި ގޮތުގައި މި ޕްރޮޖެކްޓާ ގުޅޭ ގޮތުން ޝާހްރުކާއި ސުކުމާރާ ދެމެދު އަންނަނީ މަޝްވަރާތަކެއް ކުރެވެމުންނެވެ.
ނަމަވެސް އެއްބަސްވެފައި ހުރި އެހެން ޕްރޮޖެކްޓްތަކަށް ވަގުތު ދޭން ޖެހޭތީ 2027 ގެ ކުރިން ޝާހްރުކަށް ސުކުމާރުގެ ފިލްމަށް ވަގުތު ދެވެން ނެތް ކަމަށް ބުނެފައިވާ ކަމަށް ވެސް މިޑް-ޑޭ އިން ބުންޏެވެ. އެހެންވެ އެ ދެ މީހުން މަޝްވަރާކުރާ ފިލްމުގެ މަސައްކަތް ފެށޭނީ 2027 ގެ ފަހުން ކަމަށް ބުނެފައިވެ އެވެ.
ޝާކްރުކް ދެން އެންމެ އަވަހަށް ޝޫޓިން ފަށަން އޮތް ފިލްމަކީ މަސައްކަތް ނުފެށި ވަރަށް ބޮޑަށް ދިގުލައިގެން ގޮސްފައިވާ "ކިންގް" އެވެ. އޭނަގެ 2023 ގެ "ޕަތާން" ގެ ޑައިރެކްޓަރު ސިދާތު އާނަންދު ހަދަން ހަމަޖެހިފައިވާ ފިލްމުގެ ޝޫޓިން ފަށަން މިހާރު ޕްލޭންކޮށްފައި އޮތީ އަންނަ މެއި މަހުގެ ތެރޭގަ އެވެ.
"ކިންގް" އަށް ފަހު ޝާހްރުކް ދެން ކުޅޭނީ "ޕަތާން 2" ކަމަށް ރިޕޯޓްތައް ބުނެ އެވެ.
އޭނައާ އެކު ފިލްމު ހަދަން ވަރަށް ގިނަ ޑައިރެކްޓަރުން ޝައުގުވެރިކަން ފާޅުކޮށްފައިވާ އިރު، ސުކުމާރަކީ "ޕުޝްޕާ" ގެ ދެ ފިލްމަށް ފަހު، މިހާރު އިންޑިއާގެ އެންމެ ވަރުގަދަ އެއް ޑައިރެކްޓަރެވެ. އޭނަގެ "ޕުޝްޕާ" 2021 ގައި ގެނެސްދިނުމަށް ފަހު "ޕުޝްޕާ 2" ރިލީޒްކުރީ މިދިޔަ އަހަރު އެވެ. މިއީ ޓްރިލޮޖީއެކެވެ. އެހެންވެ އަދި ކުރިއަށް އެއްބައި އެބައޮތެވެ.
ޝާހްރުކްގެ ފިލްމުތަކެއް އެންމެ ފަހުން ސިނަމާތަކަށް އައީ 2023 ގަ އެވެ. އެ އަހަރު "ޕަތާން" ގެ އިތުރުން އޭނަގެ "ޖަވާން" އާއި "ޑަންކީ" ވެސް ރިލީޒްކޮށް، އާންމުންގެ ބޮޑު ތަރުހީބެއް ލިބުނެވެ.