ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަށް ކޯޓުތަކުގެ ޤާނޫނަށް ގެނައުމަށް ފާސްކޮށްފައިވާ އިސްލާހުގެ ބިލު މަޖިލިސް ތަޅުމުން ބޭރުކުރުމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ ޕީއެންސީ މެންބަރު އަހުމަދު އަޒާން ގޮވާލައްވައިފި އެވެ.
ސުޕްރީމް ކޯޓުގެ ފަނޑިޔާރުންގެ ބެންޗުގެ އަދަދު 7 އިން 5 އަށް މަދުކުރުމަށް ކޯޓުތަކާ ބެހޭ ޤާނޫނަށް އިސްލާހު ގެނައުމަށް މަޖިލީހުން ފާސްކުރި ބިލް ތަސްދީޤު ނުކުރަން ނިންމަވައި، ރައީސް ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް އެ ބިލު އަނބުރާ ފޮނުއްވާފައިވާ މައްސަލައަށް ބަހުސް ކުރައްވަމުން އަޒާން ވިދާޅުވީ މި ބިލުގައި ޤާނޫނުއަސާސީއާ ޚިލާފު ބައެއް މާއްދާތައް ހުރި ކަމަށެވެ. އަދި މަޖީލީހުގެ ކައުންސެލް ޖެނެރަލް އާއިގެ އެޓާނީ ޖެނެރަލް ވެސް އެގޮތަށް ލަފާ ދެއްވާފައިވާ ކަމަށް އަޒާން ވިދާޅުވި އެވެ.
"މީގެ ކުރިން މަޖިލީހުގެ ކައުންސެލް ޖެނެރަލް ވެސް ވަނީ މި ބިލުގެ ޤާނޫނުއަސާސީއާ ޚިލާފު ބައެއް މާއްދާތައް ހުރި ކަމަށް ލަފާދެއްވާފަ. އަދި މި އިއްޒަތްތެރި މަޖިލީހުން މި ބިލު ފާސްކޮށްފައި ފޮނުވި ފަހުން ދައުލަތުގެ ބަންޑާރަނައިބު، މި ވަނީ ރައީސުލްޖުމްހޫރިއްޔާއަށް ލަފާދެއްވާފައި މި ބިލުގެ ބައެއް މާއްދާތައް ޤާނޫނުއަސާސީއާ ފުށުއަރާ ކަމަށް،" އޭނަ ވިދާޅުިވި އެވެެ. "އެހެންވީމާ މި ބިލާ މެދު ވާންޖެހޭ ގޮތް ވަރަށް ސާފު މި ބިލު އަޅުގަނޑަށް ފެންނަނީ މަޖިލީހުގެ ތަޅުކޮށް ބޭރުކޮށްލަން."
އަޒާން ވިދާޅުވީ ފަނޑިޔާރުގެ އިސްލާހު ކުރަން ޖެހޭކަމީ އެންމެން ވެސް ޤާބޫލުކުރާ ކަމެއް ކަމަށެވެ. ނަމަވެސް އެކަން ކުރަން ޖެހޭނީ އަވަސް އަރުވާލައިގެން ނޫން ކަމަށާއި މީހުންނަށް ފާޑު ނުކިޔޭނެ ގޮތަށް ވެސް ވިދާޅުވި އެވެ.
އެ ބިލު ފާސްކުރުމާ މެދު މިދިޔަ ފެބްރުއަރީ މަހުގެ 26 ވަނަ ދުވަހު ބޭއްވި މަޖިލީހުގެ ޖަލްސާގައި ވޯޓުގައި ބައިވެރިވި 77 މެންބަރުންގެ ތެރެއިން 68 މެންބަރުން ވޯޓު ދެއްވީ ބިލު ފާސްކުރުމަށެވެ. ބިލާ ދެކޮޅަށް 9 މެންބަރަކު ވޯޓު ދެއްވި އެވެ.