އައްޑޫ ގަން ޕޮލިސް އޭރިޔާގައި ހިމެނޭ ނެއިބަހުޑްތަކަށް ޒިޔާރަތްކޮށް ރައްޔިތުންނާ ބައްދަލުކޮށް މައުލޫމާތު އޮޅުންފިލުވައި ރައްޔިތުން ހޭލުންތެރި ކުރުވުމަށް މައުލޫމާތު ދިނުމަށް ގަން ޕޮލިސް ސްޓޭޝަނުން 'ވޯކް އެންޑް ޓޯކް' ހަރަކާތެއް ބާއްވައި ފިއެވެ.
އިއްޔެ ހަވީރު ކުރިއަށް ގެންދިޔަ މި ހަރަކާތުގައި ގަން ޕޮލިހުގެ ފުލުހުން ޓީމުތަކަށް ބަހާލައިގެން ގަން އޭރިޔާގެ ހަތަރު ނެއިބަހުޑްގެ ރައްޔިތުންނާ ބައްދަލުކޮށް މައުލޫމާތު ދީފައިވެ އެވެ. އެއީ ގަމާއި ފޭދު އާއި މަރަދޫފޭދޫގެ އިތުރުން މަރަދު އެވެ. އެގޮތުން، އައްޑޫ ހަންކެޑެ ބްރިޖުގެ ޓްރެފިކް އިންތިޒާމުތައް ހަމަޖެހިފައިވާ ގޮތުގެ މައުލޫމާތު ރައްޔިތުންނަށް ދީފައިވެ އެވެ. އަދި ގާނޫނާއި ގަވާއިދުތަކާ އެއްގޮތަށް ވެހިކަލްތައް ދުއްވުމަށާއި ތިމާއާއި އަނެކުންގެ ރައްކާތެރިކަން ކަށަވަރުކުރުމަށް ސަމާލުކަން ދޭން ޖެހޭ ކަންކަމުގެ މައުލޫމާތު ދީފައިވެ އެވެ.
މީގެ އިތުރުން، ސްކޭމްކުރާ މީހުން އެކަން ކުރަމުންދާ ގޮތްތަކާއި އެފަދަ މައްސަަލަތަކުން ރައްކާތެރިވުމަށް ކުރެވިދާނެ ކަންކަން ބުނެދީފައިވެ އެވެ. އަދި ފުލުހުން ފޯރުކޮށް ދެމުން އަންނަ ޚިދުމަތާ މެދު ރައްޔިތުން ދެކޭ ގޮތް ވެސް އޮޅުން ފިލުވާފައިވެ އެވެ.
މި ހަރަކާތުގެ ތެރެއިން، ރައްކާތެރިކަމުގެ މައުލޫމާތު ހިމެނޭ ލީފްލެޓް ވެސް ރައްޔިތުންނަށް ބަހާފައިވެ އެވެ.