މި މަހުގެ ތެރޭގައި ޝޫޓިން ފަށަން ތައްޔާރުވަމުން އަންނަ އަޖޭ ދޭވްގަންގެ ޖަންގަލް އެޑްވެންޗާ ފިލްމު "ރޭންޖާ" ގެ ކާސްޓާ ސަންޖޭ ދަތާއި ތަމަންނާ ބާޓިއާ ވެސް ގުޅިފައިވާ ރިޕޯޓްތައް ބުނެފި އެވެ.
މި ފިލްމަކީ އަކްޝޭ ކުމާރުގެ 2019 ގެ "މިޝަން މަންގަލް" ގެނެސްދިން ޖަގަން ޝަކްތީ ޑައިރެކްޓްކުރާ ފިލްމެވެ. މީޑިއާތަކުން ރިޕޯޓްކޮށްފައިވާ ގޮތުގައި "ރޭންޖާ" އަކީ ހޮލީވުޑްގެ ކާމިޔާބު ފްރެންޗައިޒް "އިންޑިއާނާ ޖޯންސް" ސްޓައިލްގެ ފިލްމެއް ކަމަށެވެ
"ރޭންޖާ" ގެ ބަތަލާގެ ރޯލަށް ތަމަންނާ ނެގި އިރު، އޭނަ ކުރިން ވެސް އަޖޭއާ އެކު ފިލްމެއް ކުޅެފައިވެ އެވެ. އެއީ ޑައިރެކްޓަރު ސާޖިދު ޚާންގެ 2013 ގެ "ހިންމަތުވާލާ" އެވެ.
ޕިންކްވިލާ އިން ބުނި ގޮތުގައި މި މަހުގެ ފަހު ހަފުތާ ތެރޭގައި އަޖޭ "ރޭންޖާ" ގެ ޝޫޓިން ފަށާ އިރު، ތަމަންނާ އާއި ސަންޖޭ ކްރޫއާ ގުޅޭނީ އަންނަ މަހުގެ ކުރީކޮޅު ކަމަށެވެ.
މި ފިލްމު ސިނަމާތަކަށް ގެންނާނީ އަންނަ އަހަރު އެވެ.