ރާއްޖޭގައި ހަށިވިއްކުމުގެ ވިޔަފާރި ފުޅާކޮށް ކުރަމުން ދިޔަ ބިދޭސީ އަންހެނުންތަކެއް އަތުލައި ގަނެ، ދެ މީހަކު ޑީޕޯޓްކޮށް އަނެއް މީހާ ވެސް ޑިޕޯޓް ކުރަން މަސައްކަތް ކުރަމުން އަންނަ ކަމަށް އިމިގްރޭޝަނުން މިއަދު ބުނެފި އެވެ.
މީގެ ތެރޭގައި ހިމެނެނީ ވިއެޓްނާމުގެ 44 އަހަރުގެ މީހަކާއި އެ ގައުމުގެ 38 އަހަރުގެ މީހެއްގެ އިތުރުން ލާއޯސް އަށް ނިސްބަތްވާ 37 އަހަރުގެ މީހެކެވެ.
އިމިގްރޭޝަނުން ބުނީ މި ތިން މީހުންނަކީ ވެސް ރާއްޖޭގައި ވޯކް ވިސާގައި އުޅެމުން ދިޔަ އަދި ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރަމުން ދިޔަ ބައެއް ކަމަށެވެ.
ގަވާއިދާ ހިލާފަށް ބިދޭސީން ހޯދަން ކުރިއަށް ގެންދާ އޮޕަރޭޝަންގެ ތެރެއިން މީގެ ކުރިން ވެސް އެކި ފަހަރު މަތިން ހަށިވިއްކަމުން ދިޔަ ބިދޭސީންތަކެއް އަތުލައިގެންފައިވެ އެވެ.