"ބިންވެރިޔާ" ސްކީމާ ގުޅޭ އޮޑިޓަކަށް ފަހު ފާހަގަވި މައްސަލަތައް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފުލުހުންނަށް ހުށަހަޅައިފި އެވެ.
އެ ކުންފުނިމް މިއަދު ނެރުނު ބަޔާނެއްގައި ބުނީ ކުރީގެ ސަރުކާރުން ފެށި 'ބިންވެރިޔާ' ސްކީމުގެ ދަށުން ހުޅުމާލޭން ދޫކޮށްފައިވާ ބިންތަކުގެ އިމާރާތް ކުރުމުގެ ހުއްދައަށް އެ ދޭއިރު، އެއް ބިމަކަށް އެއް ފަރާތަށް ވުރެ ގިނަ ފަރާތްތަކުން އިމާރާތް ކުރުމުގެ ހުއްދައަށް އެދި އެ ކޯޕަރޭޝަނަށް ހުށަހަޅަމުންދާ ކަމަށެވެ. އަދި އެކަން ސަމާލު ކަމަށް އައުމާ ގުޅިގެން އިތުރަށް ބަލައި ކަމާ ގުޅޭގޮތުން އަޅަން ޖެހޭ ފިޔަވަޅުތައް އަޅަމުން އަންނަ ކަމަށް އެޗްޑީސީން ބުންޏެވެ.
އެ ކުންފުނިން ބުނި ގޮތުގައި 'ބިންވެރިޔާ' ސްކީމާ ގުޅޭ އޮޑިޓުން ފާހަގަވި މައްސަލަތައް އިތުރަށް ތަހުގީގު ކުރުމަށްޓަކައި ފުލުހުންނަށް ހުށަހަޅާފައިވާ ކަމަށެވެ.
އެޗްޑީސީން ބުނީ ކުރިއަށް އޮތް ތަނުގައި ވެސް މިފަދަ ކަންކަން ބަލައި އަޅަން ޖެހޭ އެންމެހާ ފިޔަވަޅުތައް އެ ކޯޕަރޭޝަނުގެ ފަރާތުން އަޅަމުން ގެންދާނެކަމުގެ ފުރިހަމަ ޔަގީންކަން ދޭ ކަމަށެވެ. އެވެ. އަދި ކުންފުނިން އަބަދުވެސް މަސައްކަތް ކުރަނީ އާންމުންގެ ލާބަ އާއި މަންފާއަށް އަދި އާންމުންނަށް ދޭން ޖެހޭ ހިދުމަތްތައް ނަޒާހަތްތެރިކަމާ އެކު، އެންމެ ފުރިހަމައަށް ފޯރުކޮށް ދިނުމަށް ކަމަށް ބުންޏެވެ.
"ބިންވެރިޔާ" ސްކީމާ ގުޅޭ މައްސަލަތަކެއް ފުލުހުންނަށް ހުށަހެޅި އިރު، އެ ސްކީމްގެ ދަށުން ހައްގު ނޫން ބަޔަކަށް ބިންތަކެއް ދޫކުރި މައްސަލަތަކެއް މިދިޔަ އަހަރުގެ ފަހުކޮޅު ފެންމަތިވި އެވެ. އެކަމާ ގުޅިގެން އެޗްޑީސީގެ އޭރުގެ މެނޭޖިން ޑިރެކްޓަރު ފަޒުލް ރަޝީދާ އިސް މުވައްޒަފުންތަކެއް ސަސްޕެންޑްކޮށް، ފަހުން މަގާމުތަކުން ވަކިކޮށްފައިވެ އެވެ.
ފަޒުލް ވަނީ ސަސްޕެންޑްކޮށްފައި ވަނިކޮށް މަގާމުން އިސްތިއުފާ ދެއްވައިފަ އެވެ.