“މިނިވަން 50 ޗެމްޕިއަންޝިޕް” ފުޓްބޯޅަ މުބާރާތުގައި ވާދަ ކުރާ ހިތަދޫ ފުޓްބޯލް ކުލަބް (އެޗްއެފްސީ) ޓީމްގެ ފަރާތުން ފަންޑް ރެއިޒް ކުރުމަށް ވިއްކަމުން ގެންދާ އެ ޓީމުގެ ދިދައެއް -/10000 ރުފިޔާއަށް، ހިތަދޫގެ ވިޔަފާރިވެރިއެއް ކަމުގައިވާ އަލީ ލަތީފް ގަނެފިއެވެ.
މައުލޫމާތު ލިބިފައިވާ ގޮތުގައި މިއީ ހިތަދޫ ޓީމުގެ ފަރާތުން ދިދަ ވިއްކަން ފެށިފަހުން އެޓީމުގެ ދިދައެއް އެންމެ ބޮޑު އަގެއްގައި ވިކުނު ފުރަތަމަ ފަހަރެވެ. އެޓީމުން ދިދަ ވިއްކަމުން އަންނަނީ، -/1000 ރުފިޔާ އާއި -/10000 ރުފިޔާ އާއި ދެމެދުގެ އަގުތަކެއްގައެވެ.
ހިތަދޫ ފުޓްބޯޅަ ޓީމުގެ ފަރާތުން މައުލޫމާތު ދެއްވާގޮތުގައި އެ ޓީމަށް މާލީ ގޮތުން ބޭނުންވާ އެހީތެރިކަން ހޯދަން އެކި ފަރާތްތަކާ އަންނަނީ ވާހަކަ ދައްކަމުން އަންނަ އިރު ހިތަދޫގެ ކުދި ވިޔަފާރިވެރިންގެ ފަރާތުން ބޮޑު އެހީތެރިކަމެއް ލިބެމުން އަންނަ ކަމަށެވެ.
އެގޮތުން ހިތަދޫގައި ހިންގާ އައިރިސް ޓްރޭޑާސްގެ ވެރިޔާ އިޤްބާލް ވަނީ އެޓީމަށް ފުޓްބޯޅަ ތަކެއް ވެސް ހަދިޔާކޮށްފައެވެ.