Last Updated: April 4, 22:44
Friday, April 4, 2025
ޚަބަރު

ސްޓޫޑެންޓް ލޯން ފައިސާ ލިބުން ލަސްވާތީ ވަޒީރާ ސުވާލުކުރަނީ

މިނިސްޓަރު ޑރ. އަލީ ހައިދަރު- ފޮޓޯ: ރައްޔިތުންގެ މަޖިލިސް

ސަރުކާރުން ފޯރުކޮށްދޭ ސްޓޫޑެންޓް ލޯން އަދި ސްކޮލަޝިޕްގައި ކިޔަވާ ދަރިވަރުންނަށް ދޭ ސްޓައިޕެންޑް ފައިސާ ޖަމާކުރުން ލަސްވުމުގެ ޝަކުވާތައް ލިބުމާ ގުޅިގެން، ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދާ ސުވާލުކުރުމަށް ހިތަދޫ މެދު ދާއިރާގެ މެމްބަރު އަހުމަދު އަޒާން ހުށަހަޅުއްވައިފި އެވެ.

އަޒާން ވަނީ ދެ ސުވާލެއް ވަޒީރާ ކުރުމަށް ހުށަހަޅުއްވާފަ އެވެ.

އެގޮތުން ސްޓޫޑަންޓް ލޯން ފައިސާ އަދި ސްޓައިޕެންޑް ފައިސާ ދަރިވަރުންނަށް ލިބުން ލަސްވުމުގެ ޝަކުވާތައް ދަރިވަރުންނާއި ބެލެނިވެރިންގެ ފަރާތުން ހިއްސާކޮށްފައިވާ ކަމަށް އަޒާން ވިދާޅުވި އެވެ. މި ފީތައް ސަރުކާރުން ދަރިވަރުންނަށް ޖަމާކުރުމުގައި ލަސްވަނީ ކީއްވެކަމާއި އެހެން ލަސްވުމަށް މެދުވެރިވާ ސަބަބު ނައްތާލުމަށް ކުރެވިފައިވާ މަސައްކަތަކީ ކޮބައިކަން ސާފުކޮށްދިނުމަށް ވަޒީރުގެ ކިބައިން އަޒާން ވަނީ އެދިވަޑައިގެންފަ އެވެ.

އަދި ދަރިވަރުން ވުޒާރާއަށް ފޮނުވާ އީމެއިލްތަކާއި ސިޓީތަކަށް ޖަވާބުދިނުމުގައި ލަސްވަނީ ކީއްވެކަމާއި އެކަން ހައްލުކުރުމަށް ވުޒާރާއިން އަޅާފައިވާ އަދި އަޅަމުންދާ ފިޔަވަޅުތަކަކީ ކޮބައިތޯ ވެސް އަޒާން ސުވާލުކުރެއްވި އެވެ. މިކަމުގެ ޝަކުވާ ވެސް ބެލެނިވެރިންނާއި ދަރިވަރުންގެ ފަރާތުން ލިބިފައިވާކަން އަޒާން ފާހަގަކުރެއްވި އެވެ.

އަޒާން މި ސުވާލުތައް ހުށަހަޅުއްވާފައިވާއިރު، ސްޓޫޑަންޓް ލޯނާއި ބެހޭގޮތުން ވުޒާރާއަށް ފޮނުވާ ސިޓީތަކާއި އީމެއިލްތަކަށް ޖަވާބެއް ނުލިބޭ ކަމުގެ ޝަކުވާތައް ދަރިވަރުން އަންނަނީ ސޯޝަލް މީޑިއާގައި ކުރަމުންނެވެ.