ގޮވާމުން ފިކުރު ޒަކާތް ދައްކަން ބޭނުންވާ ފަރާތްތަކަށް އަންނަ ހޮނިހިރު ދުވަހު އެ ފުރުސަތު ހުޅުވާލާނެ ކަމަށް ޒަކާތު ހައުސް އިން މިއަދު ބުނެފި އެވެ.
ޒަކާތު ހައުސް އިން ބުނީ އެހެން އަހަރުތަކެކޭ ވެސް އެއްފަދައިން މި އަހަރުވެސް ގޮވާމުގެ ބާވަތްތަކުން ފިތުރުޒަކާތް ދެއްކުމަށް ބޭނުންވާ ފަރާތަތްތަކަށް އެ ފުރުސަތު މި މަހުގެ 22 ވާ ހޮނިހިރު ދުވަހުން ފެށިގެން މި މަހުގެ 25 ވާ ބުރާސްފަތި ދުވަހުގެ ނިޔަލަށް ހުޅުވާލާނެ ކަމަށެވެ.
މި މުއްދަތުގައި ޒަކާތް ބަލައިގަންނަން ހަމަޖެހިފައިވަނީ މެންދުރު 1:00 އިން ހަވީރު 4:00 އާ ދެމެދު ކަމަށް ޒަކާތު ހައުސް އިން ބުނެ އެވެ.
ފިތުރު ޒަކާތުގެ ގޮތުގައި ދައްކާނީ އެ ބަޔަކު އާންމު ގޮތެއްގައި ކެއުމަށް ބޭނުންކުރާ ގޮވާމުގެ ބާވަތަކުން ބޮލަކަށް 2.4 ކިލޯގެ މިންވަރެވެ.
ޒަކާތު ހައުސްއިން ބުނީ މާލެ ސިޓީގައި ގޮވާމުން ފިތުރު ޒަކާތް ބަލައިގަތުމަށް ހަމަޖެހިފައިވަނީ، މަޖީދިއްޔާ ސްކޫލުގެ ސަލާހުއްދީން ހޯލު (ކުރީގެ ދަރުމަވަންތަ ސްކޫލް ހޯލު)ގައި ކަަމަށެވެ. އެގޮތުން ގޮވާމުން ފިތުރު ޒަކާތް ދެއްކުމަށް ދާ މީހުން ކުރީގެ ދަރުމަވަންތަ ސްކޫލުގެ މައި ގޭޓު ބޭނުންކުރުމަށް ޒަކާތު ހައުސްއިން ވަނީ އެދިފަ އެވެ.
ފިތުރު ޒަކާތުގެ ގޮތުގައި ބަލައިގަތުމަށް ހަމަޖެހިފައިވާ ބާވަތްތައް:
– އާދައިގެ ހަނޑޫ
– ތައިލެންޑް ހަނޑޫ
– ބާސްމަތީ ހަނޑޫ
– ރަތް ހަނޑޫ
– ގޮދަށް ފުށް
– އާޓާ ފުށް