Last Updated: April 4, 22:44
Friday, April 4, 2025
ޚަބަރު

މިސައިލް ގަތުމާ ގުޅޭގޮތުން މިނިސްޓަރާ ސުވާލުކުރަނީ

އަސްކަރީ މިސައިލު ގަތުމާ ގުޅޭގޮތުން ޑިފެންސް މިނިސްޓަރު ޣައްސާން މައުމޫންއާ ސުވާލުކުރުމަށް ހުށަހަޅައިފި އެވެ.

މިނިސްޓަރު ޣައްސާންއާ ސުވާލުކުރަން ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހުމަދު ނަސީމެވެ.

މީކާއިލް ހުށަހެޅީ ދިވެހި އަސްކަރިއްޔާގެ ބޭނުމަށް އެއްވެސް ބާވަތެއްގެ މިސައިލެއް ގަތުމުގެ އެއްވެސް މަޝްވަރާއެއް އެއްވެސް ފަރާތަކާއެކު ކުރިއަށްގެންދޭތޯ ސުވާލު ކުރުމަށެވެ.

މީގެއިތުރުން މީކާއިލް ވަނީ މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން 14 ބިލިއަން ރުފިޔާއަށް ހުޅުމާލެއިން ބިމެއް ގަތުމަށް ނިންމާފައިވާ އިރު، އެކަމުގެ ސަބަބުން ކުރިން އިގުތިސާދުގައި ދައުރުވަމުން ނުދާ، އާ ދިވެހި ރުފިޔާ އިގުތިސާދުގައި ދައުރުވާން ފަށާނެ ކަމަށް ގަބޫލުކުރެއްވޭތޯ ފިނޭންސް މިނިސްޓަރު މޫސާ ޒަމީރާއި ސުވާލުކުރަން ވެސް ހުށަހަޅާފަ އެވެ.

އަދި އަދަދު ނޫހުގެ ސީއީއޯ ހުސައިން ފިޔާޒް މޫސާއަށް ރައީސް ޑރ. މުހައްމަދު މުއިއްޒު ފޯނުން ގުޅުއްވައި ބިރުދެއްކެވި ކަމަށްބުނާ މައްސަލައިގައި އޭނާއަށް ރައްކާތެރިކަން ފޯރުކޮށްދިނުމަށް ފުލުހުން އަޅާފައިވާ ފިޔަވަޅު ސާފުކުރުމަށް ހޯމް މިނިސްޓަރު އަލީ އިހުސާންއާ ވެސް ސުވާލުކުރުމަށް މީކާއިލް ވަނީ ހުށަހަޅާފަ އެވެ.