ގައުމީ ޔުނިވަސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) އާއި އިސްލާމިކް މިނިސްޓްރީ ގުޅިގެން ސިލްސިލާކޮށް ކުރިއަށް ގެންދާ "ފަލަސްތީން ފޯރަމް" ގެ ދެވަނަ އެޑިޝަން މި މަހު އައްޑޫގައި ބާއްވަން ނންމައިފި އެވެ.
އައްޑޫގައި ފޯރަމް ބާއްވަން ނިންމާފައި ވަނީ މި މަހުގެ 23 ވަނަ ދުވަހުގެ ރޭ އެމްއެންޔޫގެ ހިތަދޫ ކެމްޕަހުގަ އެވެ. ފޯރަމް ފަށާނީ އެރޭ 9:15 ގަ އެވެ.
ފޯރަމްގައި ފަލަސްތީނުގެ މައްސަލައަށް ޢިލްމީ ނަޒަރިއްޔާތަކުން އަލިއަޅުވައިލާނެ އެވެ. އެގޮތުން ފަލަސްޠީނުގެ މިހާރުގެ ޙާލަތާއި، މުދަލަށް ރައްކާތެރިވުމުގެ މުހިންމުކަމާއި، ފަލަސްޠީނުގެ އެކިއެކި ކަންތައްތަކާ ގުޅޭ ތަފާސްހިސާބުތައް ހިއްސާކުރާނެ އެވެ. މީގެ އިތުރުން، ފޯރަމްގެ ތެރޭގައި ޕެނަލް ޑިސްކަޝަނެއް ވެސް ކުރިއަށް ގެންދާނެ އެވެ.
"ފަލަސްޠީނު ފޯރަމް" އަކީ ޢިލްމީ ނަޒަރިއްޔާތަކުން ފަލަސްޠީނުގެ ވާހަކަ ގެނެސް ދިނުމުގެ ބޭނުމުގައި މަތީ ތަޢުލީމް ޙާޞިލުކުރާ ދަރިވަރުންގެ ފަރާތުން ކުރިއަށް ގެންދާ ސިލްސިލާ ފޯރަމް ޕްރޮގްރާމެކެވެ.
މި ފޯރަމްގެ ދެވަނަ އެޑިޝަންގެ ގޮތުގައި މި ފަހަރު އައްޑޫގައި ފޯރަމް ކުރިއަށް ގެންދެވޭއިރު، މުޅި އަހަރަށް ބަހާލައިގެން އެމްއެންޔޫގެ އަތޮޅުތެރޭ ކެމްޕަސްތަކުގައި ވެސް ފޯރަމް ކުރިއަށް ގެންދިއުމަށް ހަމަޖެހިފައިވެ އެވެ.
"ފަލަސްތީނު ފޯރަމް" ގެ ފުރަތަމަ އެޑިޝަން ބޭއްވީ މިދިޔަ އަހަރުގެ ނޮވެމްބަރު މަހުގެ 24 ގަ އެވެ.
މީގެ ދެވަނަ އެޑިޝަން އައްޑޫގައި ބާއްވަން ތައްޔާރުވަމުން އަންނަ އިރު، މިދިޔަ ޖެނުއަރީ މަހުގެ ތެރޭގައި އެއްބަަސްވުމެއްގެ ދަށުން ހަމަލާތައް ހުއްޓާލާފައި އޮތުމަށް ފަހު އިޒްރޭލުން މިހާރު ވަނީ އަލުން ފަލަސްތީނަށް ހަމަލާތައް ދޭން ފަށާފައިކަން ފާހަގަކޮށްލެވެ އެވެ.